يا سمير الوافي .. إيجا عندي ما نسألك

برشة منكم يمكن ما في بالهمش بتفاصيل الحرب اللي كان عاملها بن علي والكلاب متاعو ضدّ المدوّنات ومواقع التواصل الإجتماعي، وعلى رأسها موقع فايسبوك اللي فيه أكثر من زوز ملاين تونسي.

الكلاب هاذم - حاشاكم - ما كانوش ينحصرو في الملحقين متع رئاسة الجّمهورية بالوكالة التونسية للانترنات (وعلى راسهم عمّار 404)، وانّما كانوا فمّة زادة أنواع أخرى من الكلاب اللي كانوا مفرّقين كلّ كلب حسب النغمة اللي ينبح عليها.

النّوع الأوّل من الكلاب هاذم كانوا مسمّيين رواحهم "المدوّنون الوطنيّون" ومنهم على سبيل الذكر لا الحصر: حميدة بن جمعة، صابر بن براهيم، نوفل المصري، حازم القصوري و يامن العكّاري (اللي كان ينشط باسم ديانا ماغازين). دورهم الرئيسي كان يتمثّل في ضربان البندير لسيدهم بن علي على الانترنات من جهة، والتشكيك في وطنيّة بقيّة المدوّنين بتهم ماهيش ساهلة كيف "أعداء الوطن .. الخونة .. العملاء" من جهة أخرى.

النّوع الثاني (والأكثر خطورة) هوما الكلاب المحسوبين على الصّحافة وعلى رأسهم الدّوبرمان عبد العزيز الجّريدي متع جرايد "الحدث" و "لكلّ النّاس" والروتفايلر بوبكر الصّغيّر اللي يعتبر الانترنات "سلاح دمار شامل" وكان ديما يلوّج في مبرّرات لحجب الفايسبوك ومواقع أخرى.  

باهي .. علاش النوع الثاني أخطر من النوع الأوّل؟ 

موش قلنا اللي الفايسبوك فيه زوز ملاين تونسي؟ إيه وين كانوا التسعة ملاين لخرين؟ ماهو يا إمّا يتفرّجو في التلفزة والا يقراو في الجرايد، وبما أنّ أغلب رؤساء التحرير ومعدّي البرامج في عهد بن علي كانوا من الكلاب اللي حكينا عليهم، كان من الطبيعي أنهم يحوّلوا الجّرايد والمجلاّت والبرامج متاعهم إلى جوقة متع بندير ومناشدة، والصّحافي اللي كان يرفض ماعليه كان يمشي يشوف خدمة أخرى وإلاّ يهجّ من البلاد (وهو ما خلاّنا نخسرو الممّو متع الصّحافيين التوانسة). 

الناس اللي كانوا ما عندهمش فكرة آش معناها "انترنات" لسبب أو لآخر (كيف الوالد والا الوالدة متاعي مثلاً)، كانوا في أغلب الحالات يصدّقوا الكلام اللي يتنشر في جرايد البودورو وإلا اللي يتقال في قناة جهلبعل على "فايسبوك"، أي أنّ الفايسبوك ماهو إلاّ "جهاز استخبارات صهيوني عملوه الأمريكان باش يتجسّسو بيه على العرب ويعلّموهم الفساد وقلّة الحياء"، كيف هنا مثلاً:

وإلاّ هنا (اضغط على الصّورة للتكبير)

وقت اللي هرب بن علي، كان المفروض أنّ الكلاب متاعو ينشرو إعتذارات رسميّة في نفس الجّرايد والمجلاّت والقنوات اللي كانوا يستبلهوا بيها في العباد ويغلّطوا فيهم حول كلّ ما عندو علاقة بالانترنات والفايسبوك. بوبكر الصّغير مثلاً قعدلو طرف ضمير (أو ربّما خوف وإلاّ طمع في الرّكوب على الثّورة) سمحلو باش يعتذر من التوانسة، لكن على قناة أجنبيّة وموش في حنّبعل وهو ما يخلّيني نرفض الإعتذار متاعو شكلاً ومضمونا:

البقيّة متع الكلاب يا إمّا تبخّروا (كيف برهان بسيّس) وإلاّ ركبوا على الثورة مع بقيّة الرّاكبين ودوّروها "سياسة" بعد ما كانوا مختصّين في فاطمة بوساحة ونانسي عجرم ونجلاء (متع الحصان) و المنصف السويسي كيفاش فخور بأنّو يخون في مرتو "جسديّا" لكن موش "فكريّا".

سمير الوافي، اللي دخل للفايسبوك بفضيحة منذ 3 سنوات، واللي مئات من المشتركين في صفحتو يأكّدوا أنّو إنسان متعصّب ما يقبل حتّى رأي مخالف ويبلوكي أيّ واحد يسألو "علاش تقول اللي انت استقلت من حنّبعل وهوما طرّدوك؟" أو أيّ سؤال حول نشاطه التجمّعي السّابق، سمير الوافي هذا كان اخترع (منذ أكثر من شهر) إشاعة تقول اللي البنك المركزي باش يفلس في ظرف شهر إذا التوانسة يزيدو يتظاهروا ضدّ حكومة الغنّوشي، و هاجم في نفس "المقال" صفحات الفايسبوك هجوم واضح واتّهم مستعملي فايسبوك بالتّشجيع على "الفوضى وابتزاز الحكومة". زعمة حسب رايكم، قبل ما تتبدّل الحكومة التّبديلة الأخيرة اللي استقال فيها الغنّوشي، شكون الطّرف الوحيد اللي عندو مصلحة باش يخرّج إشـــاعة من النّوع هذاكة؟

وشكون اللي لتوّة شادد صحيح في الطّرق الرّعوانيّة متع كلاب بن علي؟ سمير الوافي:  

الكلام هذا مأخوذ من الحيط متع سمير الوافي نهار 19 مارس 2011، تفرّجوا كيفاش مازال يستعمل في نفس نظريّة المؤامرة متع عبد العزيز الجّريدي وبوبكر الصّغيّر وبقيّة كلاب بن علي باش يشكّك في الفايسبوك:

   

توّة باش نطرح شويّة أسئلة على سمير الوافي اللي لبّى ندائي وجاء:

يا سمير الوافي،

ماهو الفايسبوك جهاز مخابرات أمريكي؟

ماهو يدعم في الثورات ويبث في الفتنة؟ (بالمناسبة، آش بيك حاطط الثورات والفتنة في نفس السلّة وكأنّ الثّورة حاجة ما تصلحش؟)

ماهو يشعّل في النار؟

ماهو ينشر في الإشاعات؟ (وانت خاطيك الإشاعات يا وحيّد)

ماهو يتجسّس على النّاس؟

ماهو يعرّي فيهم ويكشفلهم في عوراتهم؟ 

ماهو يحوّل فيهم لعبيد مدمنين؟

ماهو جهاز مُريب؟

آشنوّة اللي يخلّيك تزيد دقيقة في الموقع هذا بعد ما اكتشفت فيه ها العيوب الكلّ؟

آشنوّة اللي يخلّيك تعدّي أكثر من عشرة سوايع في النهار بين بروفيلاتك وباجاتك؟

تي ها القلق والرّيسك اللي تعمل فيهم لروحك يا وخيّ!!!

ماكش خايف لا المخابرات متع الأمريكان يطيّحوك اللي انت تجمّعي؟

ماكش خايف لا مارك زوكربيرغ يكشف عليك عورتو في قالب غلطة؟

ماكش خايف لا الثقافة الأمريكية تتسرّبلك لمخّك وتنحيلك ثقافة بوس الواوا؟

تعرف آش يقولو الأمريكان؟ 

Love it or leave it

وانت بما أنّك ماكش قادر باش تحبّو ولا تخرج منّو، أي أنّك لا تحبّو لا تصبر عليه، نصيحتي ليك هي أنّك تشدّ ببّوشتك وتنقّص من الاستمناء الفكري اللي قرّاوهولك في الصّريح وجهلبعل .. كان موش فايسبوك يا سمير راك لتوّة مازلت تكتب على الكلصون اللي لوّحوه على رامي عيّاش في قرطاج.

آه حقّة كنت باش ننسى يا سمير .. مازلت تبارتاجي فيها هاك الفيديو "الثوريّة" متع سليم شيبوب اللي هرب وانت تجري وراه وتعيّط "يا سي سليم .. يا سي سليم"؟

والسلام عليكم ورحمة الله وبركاته.