2011-06-17

قاضي متسيس = قاضي عندو قابليّه للإستقلاليّه


أكثر ما آلمني عندما استيقنت رحيلك عدى الذهول ..أنك لم تعيشي فعلا الحياة في هذا الوطن الذي يسحق  السكينة داخل القلوب . وهذا أمر آخر يدفعني للغضب . 
نذكّر قبل ما ندخل للفاك باش نقرا القانون كنت نظن إنّو من الممكن نختارو آش نعملو بحياتنا وبيانسور كيف تقرا القانون طغزر للصوسيتي من جانبها القيمي ويا لهفي لحكايه طلعت حوله , برشه قوانين في بلادنا تنجّم تشد لام وتفطق مواهبك في روحك .. دونك قبل مانقرا القانون كنت نستخايل إنّو العرك ولّا لخصومه مربوطه بالمصالح ويكفي إنّك تدع الخلق للخالق واطّيّح لحسابات مع الناس آناثي وذكوره باش تولّي أقرع وعندك مرايات مدورين وتكركر في معزه  وراك لكن في لخّر تعلّمت إلّي المعادله هذه تشبّه لهاك المثل إلّي نختزلو في حاجه يقولوها التوانسه لعنب في اليالي ..تنجّم تكون واحل مع روحك في حسابات سخصيّة  بزّاف وتركرك في كاس تاي احمر وتلقى روح لاحم في عركه وشادد غارد ما تعرفش منين جاك الكروشي ووحده ثنين مسبول على ظهرك كالفكرون والجموع عينيها خارجه زوز ميترو القدّام ..
يلّي ما تحشمش يا مسيّس ! 
هيّا برك نعرف إلّي تستخايلوني نفلّم لا بالرّسمي يحصل في تونس إنّو صار فهم السياسه تهمة تلصق بالقاضي وانجّم ندّعي إنّو أغلب إلّي تلمدو ورا الهيكل الجديد إلّي إسمو نقابة القضاة إدّعاو إنهم يرفضو تسيّس القاضي وخروج الجمعيّه الهيكل إلّي لنهارين لتالي كان ملمّد كافة القضاة  عن المسار المحايد لدور القاضي ودوحي يا مباركه بحمد حتّاش يرقد .
تونس هرم مسطّح من القمّه حتاش السّاس .. نعطيكم لبرايف رئيس الجمهوريّه متاعنا آش كان : سرّاق وزاني وقتّال أرواح ويسنيفي وفي روايه للوطنيّه طبعه عميل للموسّاد ومعظم الوزراء سرّاق ولّا مرتشين ولّا شياطين خرس وفي روايه أخرى شياطين خرس أمّا يديهم انضاف ..اللوطه شنلقاو براسك كوبي كونفورم وبلادنا كيف كيف هي وبقرة حاحا النطاحه متاع الشيخ ليمام ..
إي وكيف نفركو رمّانة القاضي المسيّس عندو كارطه متاع حزب ؟ لا ! أما يفهم خزعبلات الحياة السياسيه في بلادنا ويتعامل في فهم الإجتماعي والقضايا إلّي تترفع قدّامو على أساس وضع المعطى  السياسي بعين الإعتبار مع الإعتماد على القاعده القانونيه إلّي يلزمو يطبّقها أمّا باش يثبّت في الوقايع يلزم يكون قادر على تكييف الشي المعروض عليه وكيفاش  القاضي يكون عادل بلاش فهم للسياسه أو أن يكون مسيّسا من غير إنتماء حزبي ؟
مبعّد 14 جانفي رجعو لتمثيل جمعية القضاة التونسيين فرسان كانو يمثلو المكتب التنفيذي إلّي تخمّر عليه الوذير الساابق البشير التكاري وقام بتنظيم تحرّك إنقلابي عليهم لأنهم طالبو باستقلال القضاء إلّي ما ينجّم يقابل إلّا مساواة الكل أمام القانون .. وقتلّي رجعو إنحازو للشعب وعلى خلاف أي  هيكل آخر طالبو بتطهير القضاء كمطلب أساسي تحط في فيفري قدام لزهر الشابي باش يمكن إرساء عداله متوازنه في انتظار إعادة هيكلة البلاد من خلال إعادة صياغة الدستور وتنقيح جمله من القوانين الجايره إلّي ما يمكنش للقاضي إغفالها بحكم إنّو يطبّق القانون موش يصيغو ..عاد قامت الحرب الضروس و شعلت يا رجال كيفاش رئيس الجمعيّه باسم الهيكل دخل في الحياة السياسيّة ..
عمل حزب ؟ 
لا ! إنظم لمجلس حماية الثوره وطالب بإشراك القضاة في إستحقاقات الإنتقال الديموقراطي .. إي أمّالة شنيّه دور القاضي يقعد في تركينه ( البرج العاجي هذيّه كيف خرافة أمّي السيسي ) وقام المكتب بحمله توعويه للشعب حول مبدئية المطالبه باستقلال القضاء وكلاهم الهاش خرجو جماعه قالو ما يساعدناش أحنا يلزم نقعدو على نفس المسافة منّاس الكل إي علاش لا إنّجموا زاده نبنكو ونعملو شيشه وكاس سيتروناد بلّوز لخضر ونغنّيوغنّاية الفيراج آه يازين آه يازين ونخلّيو الشعب يقدّم تضحياتو وشهداه وجوعو وذهولو ويكمّل مقاومتو لفلول الدكتاتور كان غلب هانا معاه يجيبلنا الإستقلاليه عاد والزياده في الشهريّه وكان تغلب أرجع لدودك يا بن دود وموش لازم نحكي إلّي فمّه تعرفوه ..
 خرجو نقابة ! ردّو بالكم النّاس تطمح إنّو القضاء يولّي سلطه باش تحد سلطة التنفيذي والتشريعي كيف ما كان يغنّي روسّو في نظريتو للعقد الإجتماعي في تونس مابعد 14 جانفي فمّه جماعه ملقضاة على نيّتهم خمموا إنّو النزول بالقضاء لمصاف القوّه الشغليّه لرعاية المشاغل المطلبيّه للقضاة من الشهاري للمنافع العينيه وبنوات ليسونص والترقيه والّزي منّو بعيد عالتسيس يا بوقلب مطمح للنأي بالقضاء من التجاذبات السّياسيه هههههههععععع !
وخياني النقابيين إلّي يمثلو القطاعات الشغليه في البلاد يسامحوني راني نقر بكونهم الهيكل الوحيد إلّي يصح فيهم قصيد أولاد أحمد بأنهم كهيكل يحبّون البلاد كما لم يحب البلاد أحد أمّا في دوله لازم يتهيكل القضاء كسلطه موش كقوه شغليه باش يمارس هاك المعادله بأنّوالسلطه تحد السلطه ولو كان جا القضاء في تونس سلطه مستقلة لأمكن للقاضي إعمال قاعدة الدّفع بعدم دستوريه القوانين فإذا ألزم بتطبيق قانون مخالف لقواعد الدستور إستبعد تطبيقها وهذا من شأنو إنّو يساهم في تعديل القوانين الصادره عن مجلس النوّاب ويحد من إمكانيّة مخالفة القواعد القانونيه للدستور ومن شانو حماية المتقاضي من القوانين الجايره إلّي يمكن تتسلّط أعليه وتكون مجحفة في حقّو مشّيره لخره القضاء ينجّم يحمي الناس من أمثال بعلول وما تعرفنيش شكون آنا ويخضع القاضي مهما كانت رتبتو لمعيار الشفافيه ومن أين لك هذا .
زوز هياكل لتمثيل 2300 قاضي وجهة مفاوضه في المقابل واحده .. إي كيف يتفاوضو هزّوز هياكل مع لوزاره على نفس المطالب وإذا كان سقف التطلّعات مختلف ,  لوزاره عندهاش الحق تقوللهم برّاو عدلو أوتاركم وهاتوّه نحكيو ! وقتها يتعملشي تورنوا والرابح يتقدّم هو للمفاوضه ..
قلّك السبسي القضاة آش لزهم ما يكونوش مستقلّين إي واش لز حمّه يغنّي واش لز بعلول يدخّل في البلاد في حيط ولّي جاو إمبعّد ليقو وراه ! آشنوّه إلّي معطّل عمليّة التطهير إلّي طالبت بيها الجمعيه من أوّل نهار وأعلاش مبعد خمسه أشهر ما توفرتش الحمايه الأمنيه للقضاة وأعلاش البطاقات القضائيه إلّي يصدرو فيها بعض قضاة التحقيق موش قاعده تتنفّذ والأهم أعلاش ما صدرش مرسوم بتشكيل مجلس أعلى للقضاء المنحل يكون منتخب من عموم القضاة ويكون انتقالي في إنتظار إعادة صياغة الدستور ... المطالبه بالضمانات : آش يأكد إنّو أي إجتهاد لقاضي مستقل ما يلقاش روحو محندر كيف السيد القاضي المختار اليحياوي مادام الظل والشمس مزّالو يلعبوا للشعب بخطّة 4 -4 - 2 والقنّاصه ما عندهمش وجود ! 
كل شي زايز أهّوكه أعلاش فمّه قضاة عندهم فوبيا فهم السياسه ردوا بالكم الفهم يا بوقلب أمّا التسيّس توّه يتوفّاو ما تنساوش ينجّم يكون العبد متسيّس ما غير أي إنتماء حزبي وهكاكه يحافظ القاضي على حيادو ما غير ما يولّي كيف هاك الهايشه إلّي كان الماهاتما غاندي يكركر فيها وراه الحكمه في راس المهاتما والتهمه في راس إلّي يحب يولّي معزه .. ذلك الكائن الغريب !
إمممم هذيه مطالب جمعيّة القضاة المسيسه .. فرسانها الذين تقاطع معهم دربي دون أي ظغط  كعنصر قاعدي بدون تعبويّه لا يزالون على رأي عضو من الهيئة الإداريّه رافعين للواء الكفاح وشابعين مقصّات ومشطه من كل حدب وصوب ويتلقون للأسف نيران صديقة من بني الجلده إي أعلاش لا ؟! ما يمنعش إنّو التسيّس حل عينين الشعب على ضرورة المطالبة باستقلاليّة القضاء أوّلا وتطهيره ثانيا ولاباس خشم وزوز ظلوع مكسرين ومزلت نتنفس إييييي يّه !
read more "قاضي متسيس = قاضي عندو قابليّه للإستقلاليّه"

2011-06-13

حديث في العمق بما أمكن


قبل الرابع عشر من جانفي وبعده لم تتحرك المسؤسسة العسكرية ببلادنا لحماية البلاد وعبادها من التنكيل الذي تعرض له البشر والحجر.. وتذكّروا الوقت الذي أخذته عمليّة القمع لاحتجاح الناس بتالة .. كان انتشار أبناءنا من الجنود محايدا الى حدّ مستفز ولن أبالغ إن قلت أننا كنا نتفهم ذلك في وقت لم تكن آلة القتل فيها معلومة ولم  نكن لنرضى أن تقع مواجهة شاملة مع أعوان الأمن الداخلي الذين ثبت براءة أغلبهم لأن القتلة الذين يريدون أن نعتقد أنهم كالعنقاء والغول ليس لهم وجود ضيقوا دائرة تحركهم تماما كما عملوا في السريّة ليحموا أنفسهم عند الفشل وليغيروا مخططاتهم متى  أرادوا . 

بعد أشهر وعلى مربع من قوّات الجيش وفي حالة طوارئ مستمرة بالبلاد يقتل الناس المدنيون من مدنيين مثلهم تحت الأرجل وبالطعنات، ويصيح القاتل جوابا للعسكري الذي آذن بالموت "الطحان مزال يتنفس" .. ما من طلقة في الهواء لحماية جثتي القتيلين قد تكون أيها العسكري غير ملوم لأنك لم تلقى الدربة لحماية المواطنين من بعضهم، ولكن أين فطرة النخوة لتخيفوا على الأقل الجبناء المتكتلين بإطلاق أعيرة في الهواء فلا يصرع هابيل مرة أخرى على يد قابيل !  قال رشيد عمار وقد كرّم ثالوث الحكم وجهه بادارة الجيوش الثلاثة "سنحمي الثورة" أو لعله قال سنكتفي بدور الملاحظ .. تذكرون مثلي  تبادل اطلاق النار الكثيف بعد 14 جانفي وكنا نعتقد أن تلك البطولة ينسج حكاياها الجنود وقد استشهد بعضهم يا لهفي وقد آذن السبسي بوهم القنّاصة وسكت قائد الجيوش الثلاثة وقد باشر أمن البلاد لخمسة أشهر كاملة فأسقط بيدي الشعب.. أي بطولة قاسية تلك لمؤسسة عسكرية لم تمنع قتل المئات في الشوارع وداخل بيوتهم وحتى بالسجون .. ولم تمنع حرق المعامل ولا المؤسسات التجارية بأكثر شوارع البلاد تدجينا "شارع الحبيب بورقيبة" فعلى من ألقيتم القبض أيام حظر الجولان وتمشيطكم البلاد يومها على من قبضتم؟

 إذن بغير تحامل،  بطولتك يا جيش بلادي إقتصرت على  العمل السلبي: الإمتناع عن القتل. ونحن نقدّر لك  ذلك على كل حال ما دام السبسي يطلب منا أن نتفهم نعيم مروقنا من سناريو ليبيا واليمن.. حسن لعله يضيف لنا في حديثه القادم أن نصلّي صلاة الشكر لنجاتنا من سناريو شبيه بما يحصل في سوريا، ولعل هذا المدعو بالباجي يتلطف علينا بأن يعزّنا في الخطاب حتى ينصرف غير مأسوف عليه. أقول و أنا أتحدّث عن قيادات الجيش لأن أفراد الجيش لا دخل لهم في اتخاذ القرار: أنا لا أفهمكم! يوم اندلعت أحداث الشغب وسط العاصمة وكان محدثوا الشغب مسلحين بالحجارة والعصي، لم تتحرك مجنزرة احدة لتسد منفذ أي مغازة وتركت المحلات لتنهب على مرمى حجر من قوات الجيش وأستقر على السؤال بالرغم من إيحاء بعضهم لي بأنه "ليس للجيش تقاليد في حماية الأملاك".. وقد شاهدت ما يخالف ذلك من جندي قام يوم 14 جانفي من حماية عدة فرع بنوك بحيّنا ومغازة كبرى من النهب والحرق ببعض الكلمات قالها من خلال بوق لتسمعه عصابة من المئات ..

لا أفهم لماذا يقع التوصّل لحماية المقر الإجتماعي لبنك الزيتونة - وليس لدي  إعتراض على الفكرة - ولا يقع في الآن نفسه احباط فرار ثمانية آلاف سجين من مؤسستين سجنيتين يسهل التحكم في منافذها رغم تأكيد وزارتي الدفاع والداخلية مضافرتهما للجهود.. تبدأ المناوشات العروشية في المتلوي منذ أواسط شهر مارس كل يجاب عند التظلم بعدم وجود تعليمات و لا تقارير أمنية للحفاظ على النظام العام، فقد بان أن النظام العام لا يراد الا بوجود سادة للبلاد يحكمون في الناس بداية من رئيس الجمهورية و نهاية لقوّاد الشعبة. أما اليوم فالتقارير معلّقة ولن تسقط حكومة اللاتوافق لا بهروب  آلاف مساجين الحق العام المدانين لجرائم خطيرة ولا لتمسكها بوزير داخلية ينتمي لديوان أسوأ وزراء الداخلية الذين عرفتهم البلاد. يلقى القبض على السيد سمير الفرياني لأجل موقف مبدئي بتهم خطيرة حسب ذكر زوجته ويفعّل القضاء العسكري الاستثنائي بشكل تعسفي وغامض، والحال أن أشد ما يخشى على المدنيين أن يحرموا من ضمانات القضاء العدلي المدني والصفة المدنية للضابط المذكور تظل قائمة رغم صفته كعون بقوات الأمن الداخلي..  ولا نفهم أيهما أخطر على أمن البلاد: تصريحات الفرياني بتطهير الداخليّه التي يعلم الصغير قبل الكبير في بلادنا حجم الفساد فيها، أو زعزعة استقرارها الأمني بحملات الاعتداء على الأملاك الخاصة و العامة والوهن الفاضح في تعقب الفساد المالي لتقديم الضمانات الكافية لرؤوس الأموال الأجنبية للحلول ببلادنا؟ وانظروا مرتبة بلادنا في هذا المجال كم هي مخزية! أما القول بأن السيد الفرياني يهدد أمن البلاد فدعوني أدخل للحسينية ...

قدّموا لنا أجوبة عن أسباب الفراغ الأمني قبل وبعد  14 جانفي! أين الأفراد المسلحون مهما كان تنظيمهم الذين ألقي عليهم القبض من وحدات الجيش والحرس الوطني وهو ما أقر به محمد الغنوشي صراحة ؟ كيف تم تهريب أحد عشر ألف مسجون ؟ وكيف هرب  ثمانية آلاف منهم مع وزير هيبة الدولة ؟ من قتل الشهداء ؟ من ينظم حملات الترويع المتواترة ؟ ومن يستهدف محبّي البلاد بسلاح القضاء الإستثنائي؟ من جلب لنا السبسي؟ ومن يبقي على المبزع ؟ ومن يعتقد بحمق أنه وبعد تكشف حجم الفساد والسرقة لأموال هذا الوطن ما علمه الصومالي قبل الأمريكي ممن باشروا الحكم لثلاثين عاما الماضية أنه ظل بالبلاد أمن وسمعة يخشى عليهما من الفرياني و أمثاله؟ أيها الأعوان الذين ألقيتم القبض على القناصة نرجوكم أن تخرجوا عن صمتكم وتباشروا واجبكم الوطني بحماية البلاد بالشهادة. أيها  الأعوان الذين عملتم لحفظ النظام أيام الثورة ففوجئتم بزميل مباشر معكم يستهدف المواطنيين بأعيرة ناريّة، بربكم قدّموا إفادتكم! كونوا بناة لتونس الكرامة! فأنتم نحن والا استعبدنا الطغاة بأسماء جديدة و منحنا تونس ليتبول على شرفها الصعاليك مجدّدا! أيّها الشهود لا تصمتوا على ما عاينتم! أحيوا تونس أو ليكن الله حسبنا فيكم إذا لم  تفعلوا .

Guygoz
read more "حديث في العمق بما أمكن"