2013-05-04

كشفُ الخْنَن في سيرَة البشير بن حسَن


 من غير مقدّمات، اليوم باش نحكيو على فينومان من الفينومانات التي ابتلانا بها الله بعد هروب حامي الحمى و الدين إلى أرض خادم الحرمين. موضوعنا اليوم هو ما اصطُلح على تسميته بـ"الشيخ" البشير بن حسن التونسي واللي أصبح بقدرة قادر يفتي في كلّ شيّ من قيادة المرأة للسيارة و جواز الحجّ لكارهي حكّام السعودية إلى شرعيّة برنامج عندي ما نقلّك و ووجوب إسقاط الإتحاد العام التونسي للشغل وحُرمة أكل العصايد.

قبل ما نبداو، لازم نسألو السؤال الأوّل: من هو البشير بن حسن؟


البشير بن حسن من مواليد سنة 1973 بمدينة مساكن، هاجر إلى فرنسا حيثُ اشتغل مساعدا لأحد مقاولي الطّلاء (الدهينة) وحضر حلقات في المساجد كان يؤمّنها شخص يُدعى فوزي. تمكّن بعد أن تسوّل مبالغ مالية من تونسيّين مقيمين بفرنسا (وهذا كلام خميس الماجري موش كلامي أنا) من السّفر إلى المملكة السعوديّة حيث حاول الإنتساب إلى جامعة أمّ القرى بمكّة لكنه رُفض لضعف مستواه العلمي. طبعــا "الشّيخ" عمرو ما يجبد عليها الحكاية هاذي، وعمرو زادة ما يجيب سيرة الزوز جامعات الي تلقّى فيهم "تكوينه" وهوما الجّامعة الأمريكيّة العالمية الي عطاتو "باكالوريوس" (ما يعادل شهادة الأستاذية في تونس) متع شريعة إسلاميّة والمركز الإسلامي و الثقافي ببلجيكا الي عطاه "شهادة في تكوين الدّعاة".


بعد البحث تبيّن أن الجّامعة الأمريكيّة العالميّة هي ليست سوى جامعة شبه وهميّة، لها مقرّ تواصل في مدينة واشنطن ولكن ليس لها حرم جامعي، تقدّم دروسا بالمراسلة عبر شبكة الانترنيت منذ سنة 2004، وهي تقدّم دروسها مجانا... وهنا خلّينا نتجاوزوا سؤال "كيفاش جامعة أمريكيّة تقرّي في الإسلام للمسلمين" خاطر السؤال الأهمّ هو "علاش؟"


وبعد البحث تبيّن أيضا أنّ "شهادة" تكوين الدّعاة متع "الشّيخ" خذاها بعد تكوين و تدريب شاقّ دام لفترة طويلة في بروكسال ... 6 أيّام يا بوقلب!! وتحديدا من 10 إلى 16 صفر 1423 هجري. يعني حاجة كيف "تعلّم الألمانيّة في أسبوع" وانتم تنجّموا تتخيّلوا النتائج متاعها وحدكم.


وكيف ما حكينا أعلاه، "الشيخ" يصرّ باش يحطّ في الموقع الرّسمي متاعو أنّه درس في جامعة أمّ القرى بمكّة (معهد الحرم المكّي) في حين أنّه ما فمّة شي يثبت ذلك، و الأدهى من ذلك هو شهادة أحمد بازمّول، أحد أساتذة هذه الجّامعة، اللي صرّح أكثر من مرّة بأنّ البشير بن حسن"يقول أنّه من طلاّب ابن العثيمين ولكنّه ليس من طلاّبه" وأنّه "مبتدع ضالّ، لا يجوز أخذ العلم منه، ولا الرّجوع إليه، ولا السّماع له، ولا الإستفادة منه حتّى يتوب إلى الله ويزكّيه العلماء" وغيرها من الشهادات الي تنجّموا تلقاوها على موقع يوتيوب.


يعني باش نلخّصو الأسطر اللي فاتوا؛ واحد قاري الإسلام بالمراسلة من عند الأمريكان، وعامل دورة في تكوين الدّعاة عند البلاجكة مدّتها أقلّ من جمعة، ويدّعي أنه من علماء الأمّة في حين أنّهم علماء الأمّة يقولو أنّه مبتدع ضال، جاء لتونس باش يعلّم التوانسة دينهم و يعمللهم "دورات علميّة"..  واللي شاكك في كلامي ينجّم يزور موقع البشير بن حسن ويشوف سيرتو الذاتية الي هو كاتبها بيدو (هنا).

السّؤال الثاني: فاش قاعد يعمل البشير بن حسن؟


الإجابة: البشير بن حسن قاعد يصبغ في الشّرعيّة السياسيّة المنتهية للإئتلاف الحاكم بشرعيّة شبه دينيّة، (وهاذي حاجة ما ينجّم يعملها كان واحد مختصّ في الدّهينة) ، بحيث عمرك ما تشوفو ينقد في المرزوقي، أو الغنوشي، أو البحيري، أو بن جعفر، أو محرزيّة... لكن في نفس الوقت يتحوّل لدوبرمان ضدّ أمّ زياد، وحمّة الهمّامي، والإتحاد العام التونسي للشّغل الّي قالّك لازم نبدّلوه باتّحاد عمّال إسلامي... وعمرك ما تشوفو يحكي ضدّ النهضويّين، لكن في نفس الوقت يهاجم السلفيّين ويوصل باش يكتب حاجة كيف هاذي بعد وفاة محمّد بختي إثر إضراب جوع... حاجة ما تبعدش برشة على اللي قالو مفتي بن علي على محمّد البوعزيزي وقت حرق روحو.


البشير بن حسن سمعناه وهو يكفّر في معارضي الحكومة و يحرّم في عصيدة الزقوقو و قيادة المرأة للسيّارة، وسمعناه وهوّ يهدّد بأنّو كان جاء الأمر بيده ما يخلّيش الناس الي تكره آل سعود تمشي للحجّ والعمرة، وسمعناه كيفاش يدافع على محمد بن عبد الوهاب الي ما قتل كان مسلمين وعمرو ما فتح أرض غير مسلمة (نتحدّى أي واحد أنّو يُثبت العكس)، لكن عمرنا مانا باش نسمعوه يطالب باسترجاع بن علي من السّعوديّة، ولا عمرنا باش نسمعوه  يحكي على صحيّبو عايض القرني كيفاش سرق كتاب متع مرا ولدها معاق وكي شكات بيه حاول يرشيها بـ10 آلاف ريال سعودي.

وتزبّبوا قبل أن يتحصرموا ... والسلام عليكم و رحمة الله وبركاته.


رمزي







  
read more "كشفُ الخْنَن في سيرَة البشير بن حسَن"

2013-05-03

فرسان الطحين الوطني معز بن غربية و سفيان بن فرحات كمثال


عندي تو قرابة نهارين نتبع في تداعيات التصريح متع طارق الكحلاوي على الفايسبوك و لو اني اخترت إني منخوضش في المسالة من منطلق بعض الاحتراز على بعض الصفات الي اطلقها طارق على المعارضين و الي هي مهاش خارجة عن سياق عام مشحون من الأطراف الكل وتبادل سباب وشتائم يوصل احيانا لحد تطيح القدّر لحد هنا متفاهمين.

لكن الي يخليك تبهم انو ثمة رهوط من الطابور العاشر و الي سلكوها من الثورة ايه يا ليتها كانت ثورة و الا راو واحد كي سفيان بن فرحات و الا ميزّو راو مطهر بقزازة غير الوقت و سياسة الايدي المرتعشة تخليهم يحلّو في جلغهم وينظروا علينا في الديمقراطية.

ايه نعم مكش غالط خويا التونسي هالحفنة متع طحانة بن علي و قت النظام كان منحكيلك الجديّدة متاعك كانوا يعطيو فيه في الشرعية و يدافعوا عليه بقلب ورب ب 100 دينار و 200دينار... ريت خويا المواطن قدكش انتي وتونس رخيص عندهم الناس هاذم.

الناس هاذم الي حاولو بكل طرق انقاذ نظام السابع الي كان يتهاوى تحت الكف و المشطة و الكرادي متع ولاد القصرين و بوزيد و صفاقس و غيرو من المناطق  ملقاش حاضنة ليه تحميه فالتجأ لاشخاص مستعدة تبيع والديها موش ولاد شعبها على حفنة من الفلوس.

البداية كانت مع بلاتو 13 جانفي في ليل 13 جانفي الي شهد مجزرة في لافيات عشرة شهداء على الاقل في المنطقة هاكي و مجزرة كيفها في الكرم و مناطق اخرى ..الدّم التونسي كان يسيل وهوما كانو محلقين في التلفزة يبيعو في دم التونسي ب 100 دينار و كان سلكها بن علي وقتها راو ناس كل مشات زيزي.

و الي يحب يتذكر ذكريات الطحين الوطني هام ساعة ونص من الطحين الذي لم يعرف العرب مثله و استمات اخر فرسان بن علي لانقاذ النظام طبعا قبل ما يخرجو نهار 14 جانفي في المشية و الجية متع شارع الحبيب بورقيبة بعد ما تحسمت المعركة و يقعدوا يستغلو فيها لانو الذي التحق متاخرا و الوقت الضائع لا معنى لالتحاقة و الحكاية تزيد في الاحتقار ليه لانو كي حس سيدوا مشى زيزي حطّ فيه ساق.

معز بن غربية موش وجه برك من وجوه النظام السابق بل مشارك في الجريمة من خلال تبريرها واون بليس وقت نظام يلتجىء لاخر ورقة ليه ويكون اسمها معز فانو يعتمد على آخر المقربين ليه و آخر من يثق فيهم... على فكرة معز قداش كان ياخو من عند بلحسن و من فلوس الشعب الي تتاخذ بغير وجه حق من تلفزة العمومية؟ إضافة إلى انو الشخص هذا الانتهازي الي كان يخاف على تونس علاش ماخافش عليها وقت مشى يناشد في بوه الحنين وقريب يردهولنا من فلاسفة التنوير و الا اليسار البوليفاري في مقال من الطحين الفاخر مازال شاهد عليه إلى اليوم؟

مبادرة فرسان القلم أو فرسان المعبد هي ايضا مبادرة طحينية للكتابة لبن علي اطلقها المستكرش سفيان بن فرحات أحد أهم الدجالين بعد الثورة الشخص الي يساهم في ارباك الاعلام و التأسيس لمفهوم اعلام الاشاعة .

دونك هالاعلامين متع بودورو و المرتزقة وقيت باش تسكرو علينا فامكم و تكونو رجال بلحق رجال و تفسحوا المجال لابناء هذا الشعب الي ساهمتو في تهميشو و الانحراف ببوصلة ثورتو و تعملو فاصلة تعتذرو بها للشعب وشوف يقبلكم من بعد و الا يبعثكم لمزبلة التاريخ مكانكم الطبيعي.


وتو نجيو لطارق الي بصراحة مهما كان الاختلاف معاه فاني شخصيا لا اقبل انو نشوف حملة الكذب و التزوير متع الحدثوت و متع من يبحثون عن بكارة جديدة بعد الثورة من منطلق الالتزام الاخلاقي على الاقل.

الفيديو هذا فيه طارق يحكي على الحجب و مبادرة رسائل للبرلمان و الي انا مثلا كنت ضدها من باب اني مانؤمنش به البرلمان هاكة وقتها و فكرة الثورة الي يحكيو بها تو ما كانتش تخطر على بال حد بما فيهم نحن الثوار الي بالمناسبة معز بن غربية و سفيان بن فرحات سمعتهم يحكيو في السياسة كان بعد الثورة و لكن الاقلية كانت معارضة وقتها زوز من ناس و الا ثلاثة من منطلق راديكالي حسب تقدير ذاتي طبعا.

طارق ولينا و حتى سفيان الشورابي و العديد و قتها بعثو جاوبات لنواب باش يوعيو بحالة الاحتقان و القمع الي يعيشها الفضاء الافتراضي من منطلق اصلاحي وهو انو من الممكن انو نظام بن علي يسترجل ويستجيب من منطلق سياسة طالب وخوذ كيما صار في ثورة الشيلي.

الفيديو هذا خارج عن سياقو وقتها حملة نهار على عمار و الي طور الى مسيرة في شارع الحبيب بورقيبة هبطو فيها عديد من المدونين الي تو قاعدين يتسبوا و كانو شجعانا حقيقة
و كي نشوف حاجات كيما هكة نعرف الناس هاذم سمعت بالثورة سمعان و مشاركتش حتى في ربع نضالية لانو الي يعرف التاريخ يعرف المدونين بلحق شعملو موش كالبهيم يبرتاجي.


وممكن ايلي وقفلي مخي أكثر هو سياسة الغباء الي ينتهجها مناشدوا بن علي بورتون يعرفوا انو الفعل هذا قذر الى درجة انهم يبدلو اسم المناشد ويتهموه هو بالمناشدة عندما تغيب الحجة يحضر الغباء معز بن غربية كمثال.

في الاخير هاذي بعض العينات من مقالات طارق حتى في جريدة صخر الماطري و الي منيش فاهم منين جا ريق المنشادة فيها ؟ وينو معز بن غربية كان يكتب في الجزيرة و الا الموقف ؟
مايا الجريبي منعرفوش طارق الكحلاوي 
  مثال من كتابات طارق الكحلاوي في الصباح حيث يحتج على صنصرته فيها


Titof
read more "فرسان الطحين الوطني معز بن غربية و سفيان بن فرحات كمثال "