2013-05-04

كشفُ الخْنَن في سيرَة البشير بن حسَن


 من غير مقدّمات، اليوم باش نحكيو على فينومان من الفينومانات التي ابتلانا بها الله بعد هروب حامي الحمى و الدين إلى أرض خادم الحرمين. موضوعنا اليوم هو ما اصطُلح على تسميته بـ"الشيخ" البشير بن حسن التونسي واللي أصبح بقدرة قادر يفتي في كلّ شيّ من قيادة المرأة للسيارة و جواز الحجّ لكارهي حكّام السعودية إلى شرعيّة برنامج عندي ما نقلّك و ووجوب إسقاط الإتحاد العام التونسي للشغل وحُرمة أكل العصايد.

قبل ما نبداو، لازم نسألو السؤال الأوّل: من هو البشير بن حسن؟


البشير بن حسن من مواليد سنة 1973 بمدينة مساكن، هاجر إلى فرنسا حيثُ اشتغل مساعدا لأحد مقاولي الطّلاء (الدهينة) وحضر حلقات في المساجد كان يؤمّنها شخص يُدعى فوزي. تمكّن بعد أن تسوّل مبالغ مالية من تونسيّين مقيمين بفرنسا (وهذا كلام خميس الماجري موش كلامي أنا) من السّفر إلى المملكة السعوديّة حيث حاول الإنتساب إلى جامعة أمّ القرى بمكّة لكنه رُفض لضعف مستواه العلمي. طبعــا "الشّيخ" عمرو ما يجبد عليها الحكاية هاذي، وعمرو زادة ما يجيب سيرة الزوز جامعات الي تلقّى فيهم "تكوينه" وهوما الجّامعة الأمريكيّة العالمية الي عطاتو "باكالوريوس" (ما يعادل شهادة الأستاذية في تونس) متع شريعة إسلاميّة والمركز الإسلامي و الثقافي ببلجيكا الي عطاه "شهادة في تكوين الدّعاة".


بعد البحث تبيّن أن الجّامعة الأمريكيّة العالميّة هي ليست سوى جامعة شبه وهميّة، لها مقرّ تواصل في مدينة واشنطن ولكن ليس لها حرم جامعي، تقدّم دروسا بالمراسلة عبر شبكة الانترنيت منذ سنة 2004، وهي تقدّم دروسها مجانا... وهنا خلّينا نتجاوزوا سؤال "كيفاش جامعة أمريكيّة تقرّي في الإسلام للمسلمين" خاطر السؤال الأهمّ هو "علاش؟"


وبعد البحث تبيّن أيضا أنّ "شهادة" تكوين الدّعاة متع "الشّيخ" خذاها بعد تكوين و تدريب شاقّ دام لفترة طويلة في بروكسال ... 6 أيّام يا بوقلب!! وتحديدا من 10 إلى 16 صفر 1423 هجري. يعني حاجة كيف "تعلّم الألمانيّة في أسبوع" وانتم تنجّموا تتخيّلوا النتائج متاعها وحدكم.


وكيف ما حكينا أعلاه، "الشيخ" يصرّ باش يحطّ في الموقع الرّسمي متاعو أنّه درس في جامعة أمّ القرى بمكّة (معهد الحرم المكّي) في حين أنّه ما فمّة شي يثبت ذلك، و الأدهى من ذلك هو شهادة أحمد بازمّول، أحد أساتذة هذه الجّامعة، اللي صرّح أكثر من مرّة بأنّ البشير بن حسن"يقول أنّه من طلاّب ابن العثيمين ولكنّه ليس من طلاّبه" وأنّه "مبتدع ضالّ، لا يجوز أخذ العلم منه، ولا الرّجوع إليه، ولا السّماع له، ولا الإستفادة منه حتّى يتوب إلى الله ويزكّيه العلماء" وغيرها من الشهادات الي تنجّموا تلقاوها على موقع يوتيوب.


يعني باش نلخّصو الأسطر اللي فاتوا؛ واحد قاري الإسلام بالمراسلة من عند الأمريكان، وعامل دورة في تكوين الدّعاة عند البلاجكة مدّتها أقلّ من جمعة، ويدّعي أنه من علماء الأمّة في حين أنّهم علماء الأمّة يقولو أنّه مبتدع ضال، جاء لتونس باش يعلّم التوانسة دينهم و يعمللهم "دورات علميّة"..  واللي شاكك في كلامي ينجّم يزور موقع البشير بن حسن ويشوف سيرتو الذاتية الي هو كاتبها بيدو (هنا).

السّؤال الثاني: فاش قاعد يعمل البشير بن حسن؟


الإجابة: البشير بن حسن قاعد يصبغ في الشّرعيّة السياسيّة المنتهية للإئتلاف الحاكم بشرعيّة شبه دينيّة، (وهاذي حاجة ما ينجّم يعملها كان واحد مختصّ في الدّهينة) ، بحيث عمرك ما تشوفو ينقد في المرزوقي، أو الغنوشي، أو البحيري، أو بن جعفر، أو محرزيّة... لكن في نفس الوقت يتحوّل لدوبرمان ضدّ أمّ زياد، وحمّة الهمّامي، والإتحاد العام التونسي للشّغل الّي قالّك لازم نبدّلوه باتّحاد عمّال إسلامي... وعمرك ما تشوفو يحكي ضدّ النهضويّين، لكن في نفس الوقت يهاجم السلفيّين ويوصل باش يكتب حاجة كيف هاذي بعد وفاة محمّد بختي إثر إضراب جوع... حاجة ما تبعدش برشة على اللي قالو مفتي بن علي على محمّد البوعزيزي وقت حرق روحو.


البشير بن حسن سمعناه وهو يكفّر في معارضي الحكومة و يحرّم في عصيدة الزقوقو و قيادة المرأة للسيّارة، وسمعناه وهوّ يهدّد بأنّو كان جاء الأمر بيده ما يخلّيش الناس الي تكره آل سعود تمشي للحجّ والعمرة، وسمعناه كيفاش يدافع على محمد بن عبد الوهاب الي ما قتل كان مسلمين وعمرو ما فتح أرض غير مسلمة (نتحدّى أي واحد أنّو يُثبت العكس)، لكن عمرنا مانا باش نسمعوه يطالب باسترجاع بن علي من السّعوديّة، ولا عمرنا باش نسمعوه  يحكي على صحيّبو عايض القرني كيفاش سرق كتاب متع مرا ولدها معاق وكي شكات بيه حاول يرشيها بـ10 آلاف ريال سعودي.

وتزبّبوا قبل أن يتحصرموا ... والسلام عليكم و رحمة الله وبركاته.


رمزي







  

12 تعليقات:

تعليق laaziz ...

بكل موضوعية ومن دون تعصب: التشكيك في قيمة الشيخ العلمية مع التكبيش في حكاية الشهايد ما عندو حتى معنى كيف يجي من واحد ما حضر حتى درس متاع الشيخ.
مسألة الشهايد في العلم الشرعي بالذات ما تعنيش حاجة كبيرة: أهم علماء العصر هذا كان التعلم متاعهم بصفة تقليدية على أيدي الشيوخ وإلي يعملوا شهايد فقط تكميل ديكور ليس إلا (حكاية يفرضها الواقع والإعلام إلخ). أما القيمة العلمية أنا شخصياً حضرت للدروس العلمية متاع الشيخ (مش "les séquences" متاع الفايسبوك) في النحو والفقه والتفسير والعقيدة تبارك الله (و نحسب روحي نجم نعمل تقييم على خاطرني تبعت مئات الدروس متاع علماء ودعاة مشهورين: مرة أخرى دروس متاع علم شرعي مش رقائق و موعظة). (مع إعتراضي الشخصي على مواقف الشيخ السياسية و تعاملو مع الجهاديين أما كل حاجة في بلاصتها).
فما تحامل على الراجل وجبدان عائض القرني (الزايد) يدل على الشي هذايا. الحاصيلو غاضتني المتنوشة كيف قصت أما كان باش ترجع بالمستوى هذا، عاد صاحبي علاش بن تيشة والورتاني والمكي مش مكفيين؟


4 مايو 2013 في 10:11 م

تعليق غير معرف ...

@azyz:
الضرب انت الكل قلت بكل موضوعية .. مالا كان جيت من غير موضوعية كيفاش كنت باش تعمل ؟
تنجم تقلي شنية اسهامات بشير بن حسن العلمية؟ اشنية مؤلفاته ؟ اشنية الاضافات اللي قدمها للاسلام ؟ والا على خاطر كلمتين حافظهم باللهجة السعودية يدجل بيها على امثالك من بسطاء العقول رديتو علامة عصره؟

4 مايو 2013 في 10:37 م

تعليق عُقاب ...

الأخ رمزي يستشهد بالبازمول ...

أوردها سعد و سعد مشتمل ، ما هكذا يا سعد تورد الإبل ...

عندي ألف ملاحظة و ملاحظة على فتاوي الشيخ بشير و اللي ما تلزمو كان هو و المغرومين بيه لأنها اجتهادات في نهاية المطاف ، أما أننا نجريوا وراء النيل من أعراض الشأخاص و من خلال مصادر خليني نقول "قبيحة" كيفما البازمول و غيره المتسميين على شيوخ التيار "المدخلي " ( مشايخ تقديس ولاة الأمور و الطعن في كل من يخالفهم من العلماء و تبديعهم ) فهذا الشيء مش مقبول و مرفوض + أضف إليه نحاملا لا مفهوما و جهلوتيا على الشيخ الإمام محمد بن عبد الوهاب ، تتحدى ؟؟... أي ياس يدي تفضل أنا نتحداك بطرح السؤال بطريقة معكوسة : هات من عندك الدليل انه الشيخ الإمام رفع السيف ضد من لا يحق له رفع السيف ضده ؟؟
+ فتح أراضي غير اسلامية ؟... يا راجل راهو عايش في الجزيرة العربية اللي كانت تتنازعها فصائل متمردة على دولة الخلافة من أصلو !!

ناقصك برشة تكوين في التاريخ...

4 مايو 2013 في 10:43 م

تعليق غير معرف ...

يا laaziz صحيح أصبح عنده زاد لا باس بيه من العلم لكن وضفه في عمل سياسي قذر و هذا يكفي باش يقال عنه مبتدع ضال...

4 مايو 2013 في 10:54 م

تعليق غير معرف ...

1-قال صلى الله عليه وسلم : "ويل لاُمتي من علماء السوء، يتخذون هذا العلم تجارة يبيعونها من اُمراء زمانهم ربحاً لأنفسهم، لا أربح الله تجارتهم" .
2-قال صلى الله عليه وسلم : ( إن الله لا يقبض العلم انتزاعا ينتزعه من الناس ، ولكن يقبض العلم بقبض العلماء حتى إذا لم يترك عالما اتخذ الناس رءوسا جهالا فسئلوا فأفتوا بغير علم فضلوا وأضلوا)

4 مايو 2013 في 11:02 م

تعليق laaziz ...

الإسهامات والبحوث انتي إلي يلزمك تلوج عليها باش تكون موضوعي وتكتب مقال يكون عندو مصداقية: ماك تحكي على البحث إي عملت بحث على شنوا الراجل يحكي ولا كيفاش يحكي.
لا يا سيدي ما يحكيش بالسعودية: ديما بالعربية الفصحى. وحكاية "بسطاء العقول" حقك راك زدتها "غسل الأدمغة" مع طرف "بول البعير" باش تولي ماشي في نفس المنظومة: كيف كيف تحكي بالعاطفة وإلتحامل: إنت ما تعرفنيش باش تقول "بسطاء العقول" والكلام القليل إلي كتبتو ما يعنيش اني كيما الصورة النمطية اللي تتصورها متاع الشخص إلي بقميص ويبيع في العطور؛ لا يا سيدي راك غالط: عندي خدمتي (أستاذ جامعي رياضيات) وعندي تجربتي وقراءاتي بالعربية وغيرها و عندي عقل نخمم بيه و نوزن بيه بعد ما نطلع ونسمع آراء الناس الأخرين. ننصحك خويا فقط ما تحكمش على عبد قبل ما تعرف شكون هوا. يا أخي كانك في تونس، برا لمساكن في ويكاند وبات في الجامع غادي وأعمل حكم موضوعي على الراجل مبني على مشاهدة مش على إستقراء يغلب عليه تأثير مسبق.

4 مايو 2013 في 11:13 م

تعليق رمزي ...

@laaziz

1) الأخ اللي يحكيلك على الإسهامات والبحوث هو أحد زائري المدوّنة، وبالتالي وَجبَ عليك توجيه تعليقك الثاني إليه وليس إليّ،ولن أجيبك عوضا عنه (وإن كنتُ أشاطره الرأي في أغلب ما قاله عنك وعن "شيخك").

2) قصّة شهادات البشير بن حسن هي مربط الفرس، لكن طبيعي انّها تظهرلك "ما عندها حتّى معنى" بما أنّو غسيل المخّ صارلك وكمّل بالـ"دروس" الي حضرتلها. كان جاء البشير بن حسن عندو علم وما عندوش شهايد ماهيش مشكلة، المشكلة هي الكذب و النفاق. كي هو ما قراش في جامعة أم القرى علاش يقول الي هو قرى فيها؟ و كي هو قرا عند الأمريكان علاش يخبّي فيها الحكاية؟

3) البشير بن حسن ما بيني وبينو شيّ، وكان جاء عالم يدعو لدين الله بنيّة صافية ومن غير خلفيّات سياسيّة مشبوهة راني ما جبدتوش، أو ربّما راني كتبتلو مقال شكر.. وقت نكتبو على انسان كيف هذا ما تستنّاش باش نحطّوه على كفوف الراحة.. طبيعي باش لغة المقال تكون هكة وطبيعي أنك تشوفها "متحاملة" بما أنك ماكش محايد.

4) عايض القرني تجبد بما أنّو زكّى البشير بن حسن وقال عليه "عالم". والناس الكل تعرف شكونو القرني وشنية حكاية كتاب "لا تحزن" ومولاتو و الرشوة الي حب يعطيهالها الخ... يعني انت حسب رايك واحد يزكيّه سارق مرتشي شنوة ينجم يكون؟

5) المعلومات حول شهادات البشير بن حسن مبنيّين على السيرة الذاتية متاعو والي موجودة في الموقع الشخصي متاعو، كان جاء بن تيشة راهو اخترعلو سيرة ذاتية من عندو. فهمت شنوة الفرق بين المتنوشة والجريدة توة؟

5 مايو 2013 في 3:01 ص

تعليق رمزي ...

@عُقاب

انت وفّرت عليّا برشة تعب، بحيث باش نجاوبك بتعليقك.

انت تقول انّو بازمّول "من مشايخ تقديس ولاة الأمور والطعن في كل من يخالفهم من العلماء وتبديعهم"؛

باهي:

البشير بن حسن شنوّة قال على بن علي؟ موش قال وليّ أمر ولازم نطيعوه؟ وفاش يعمل توة مع النهضة متع الأمريكان والمرزوقي العلماني الّي داخل خارج عليه للقصر؟ موش قال حكومة شرعية؟

البشير بن حسن فاش يقول على العلماء الي يخالفوه؟ موش ردّهم أحباش وروافض وخوارج وحدثاء الأسنان؟ وموش بعث عصابة متاعو باش يطرّدو شيخ يعطي في درس في جامع آخر؟

جاب ربّي بازمّول جاء من أهل السنة والجماعة ويعيش في مكة وإلا راكم رديتوه شيعي صهيوصليبي علوي ماسوني عميل إيران الخ..

نجيو توّة لحكاية ما تسميه أنت "الإمام الشيخ" بن عبد الوهاب. أنا قلت أنّي نتحدّى شكون يُثبت أنّو قتل ناس غير مسلمين أو فتح أرض غير مسلمة، تنجّم تُثبت مرحبا ماتنجّمش استكفى بروحك وما تتقوّاش على بدنك وتلوّجلو الأعذار في أنّو "عايش في شبه الجزيرة العربية"... زيد أقرى على العبادلة السبعة و طارق بن زياد باش تفهم الفرق بين سفاح كيف بن عبد الوهاب وفاتحين كيفهم.

وهاك تتعلّم

5 مايو 2013 في 3:26 ص

تعليق غير معرف ...

لولا الاسناد لقال من شاء ما شاء أين أسانيد بشير بلحسن و من أجازه من العلماء و لنا بعد ذلك أن نحكم عليه و الا فهو دعي لقيط

5 مايو 2013 في 9:42 م

تعليق غير معرف ...

يا ادمين بقدر ما سررت لعودة المدونة للنشر بعد الملاحم التي سجلتها خاصة في سنة 2011، بقدر ما فوجئت من "موضوعيتك" والفائدة المرجوة لك و/او للقراء من القدح في الشيخ البشير بن حسن، ارجو ان تكون المدونة مقرصنة حتى نجد عذرا يبرر نشر هذا الموضوع المسقط والمخالف للخط التحريري والعمق الفكري في طروحاتك السابقة، مع التذكير ان الكلام في هذا الشخص أو في غيره يقابله مبدا وحكمة معروفة تغنينا عن السقوط في سفاسف الكتابات واستقراء مقامات الناس: يُعرف الرجال بالحق وليس الحق بالرجال / عاشت المتنوشة التي عرفتها في سنة 2011.

7 مايو 2013 في 12:08 م

تعليق عبد الفتاح الكامل ...

يا من " لست عزيزا " اقول لك - ماكش داري على الدنيا باش راحلة - كيف يكون برايك شيخ علم و هو غير مجاز من اي عاصمة علمية ( امثال المحدث الوهمي الالماني _ عفوا _ الالبانى ) راجعوا اموركم ان اردتم ن تفوزوا بالسبق

11 مايو 2013 في 1:49 م

تعليق غير معرف ...

اولا بشير بن حسن صوفي قبوري و شيخ احمد بازمول و الشيخ بن عثيمين من افقه شيوخ موجودة والقرني فاسد مبتدع و برا اقرا سيرة الشيخ محمد بن عبد الوهاب تو تعرفو وحدك

7 نوفمبر 2013 في 5:19 م

إرسال تعليق