2011-03-22

لسعد عثمان .. إشكي بيه


لاحظنا الناس الكلّ منذ هروب المخلوع ظهور المدعو "لسعد عثمان" بصفة مكثّفة على فايسبوك، وخاصّة في الفيديوات اللي يظنّ البعض أنّو ما فمّاش منها غاية سوى "مساندة الثورة" و "الدّفاع عن تونس المسلمة"، أي بمعنى التوجّه السّياسي والإيديولوجي متع السّواد الأعظم للمواطنين التوانسة الموجودين على فايسبوك.

وقت اللي أشرت في صفحتنا على فايسبوك إلى أنّو الشّخص هذا متمعّش من الثورة وراكب عليها ومدلدل ساقيه، كانت فمّة ردود أفعال من نوع "عالقليلة هو تكلّم موش كيف الممثّلين لخرين" أو "كيفاش راكب على الثورة وهو شارك في اعتصامات القصبة" الى غير ذلك من التعاليق.

أوّلا وقبل كلّ شيّ، نحبّ نوضّح حاجة للمدعو لسعد عثمان والناس اللي "معجبين" بيه، الحاجة هاذي هي أنّ المدوّنة متاعنا كانت دائما ولا تزال ضدّ اللائكيّة وضدّ نسمة وضدّ التجمّع، وأهوكة الأرشيف على اليسار يرجع لشهر أوت 2010، معناها بالعربي مضمض يا لسعد عثمان إذا ناوي باش تلفقلنا وحدة من التهم هاذوكم.

نرجعو لموضوعنا توّة،

قلنا أنّو أغلب المدافعين عن لسعد عثمان يقولو اللي هوّ " الممثل الوحيد" اللي ساند الثورة. لكن منين جاتهم الفكرة هاذي في حين أنّ عدد كبير من الممثلين كلاو الضّرب حتّى شبعو من عند الحاكم قدّام المسرح البلدي نهارين قبل ما يتنحّى بن علي؟ ومنهم جليلة بكّار والفاضل الجّعايبي وسوسن معالج؟ وإلا رجاء بن عمّار اللي الحاكم كركرها من شعرها في شارع بورقيبة خاطرها اعتصمت قدّام المسرح؟ والا لطفي العبدلّي اللي سبّ بن علي قبل ما يتنحّى وكان ما تنحّاش راهو نحّالو راسو؟


معناها التفسير الوحيد لإقتناع الكثيرين (المغلوط) بأنّ لسعد عثمان هوّ "فنان الشعب" و "فنان الثورة الوحيد" هو أنّو فمّة شخص قاعد يروّج في الفكرة هاذي.

الاستراتيجيّة اللي قاعد يعمل فيها الشخص هذا فيها زوز جوانب: جانب مُعلن (اللي تراو فيه في فيديواتو وبروفيلو)، وجانب خفيّ (اللي باش تكتشفوه توّة).

الجّانب المُعلن يتمثل في أنّو يقعد يستنّى حاجة تثير استهجان عدد كبير برشة من التوانسة ومن بعّد يعمل فيديو يوهمهم بيه أنّو "برّدلهم على قلوبهم" من الحاجة هاذيكة. مثال: الفيديو اللي تعملت على وليد الزرّاع وإلا جمال العرفاوي وإلاّ الحكومة متع الغنّوشي وإلاّ مساندي اللائكيّة، وهي كيف ما يعرفو برشة منكم، فيديوات تعملت بعد ما هاج الفايسبوك وماج على الناس هاذوكم، بل حتّى بطلب مُسبق "أصدقاء" لسعد عثمان على فايسبوك، وعمرها ما كانت بادرة فرديّة منّو كيف ما يتخيّل البعض. بالعربي، يسمّعهم اللي يحبّو يسمعوه، ويمكن ياسر غدوة باش يسبّ سفيان بن حميدة بعد ما فهم اللي دولارو باش يزيد يطلع إذا يعمل عليه فيديو.

الجّانب الخفيّ، والقذر، واللي ما يمتّ بحتّى صلة للفنّ ولا الرجوليّة، هو أنّو لسعد عثمان عمل بروفيل مضروب. علاش عملو؟ 1) باش ينشر بيه فيديوات العراء 2) باش يسبّ بيه الناس اللي يجيو ضدّو بكلام أقلّ ما يُقال عنّو أنوّ كلام سوقي و 3) والأخطر من كلّ ذلك، باش يشوّه صورة زملاؤو الممثّلين لخرين بأشدّ الطرق دناءة وانحطاط.

البروفيل هذا يمكن ماكان حدّ يفيق بيه لولا اللي صار البارح في الليل، واللي وصللي في صفحتنا على فايسبوك عن طريق أحد الأعضاء مشكور. إذ تدلّ كلّ المعطيات (بما فيها آثار "العركة" في حيط لسعد عثمان) على أنّ طفلة تعاركت مع لسعد في حيطو واتهمتو بأنّو يسبّ فيها ببروفيل مضروب بعد ما كتبتلو كلام ما عجبوش في بروفيلو الأصلاني. للأسف ما خلطتش على العركة باش "نصوّر" بما أنّو لسعد بلوكا الطّفلة بعد ما سبّها هو و"صحابو"، لكني تمكّنت من الحصول على رابط البروفيل محلّ الجّدل عن طريق نفس العضو متع صفحتنا اللي نجدّدلو الشكر متاعي. 

من أوّل نظرة على حيط "اشكي بيه" (اسم البروفيل المضروب) تفهم اللي مولاه ما ينجّم يكون كان لسعد عثمان: تمجيد للسعد "فنان الشعب"، سبّان كلّ ممثل مسرحي خلاف لسعد عثمان، وأسلوب الكتيبة .. كلّها أدلّة واضحة على أنّ نفس الشخص هو اللي يستعمل في الزوز بروفيلات هاذم: (إذا تحب تكبّر أي تصويرة انزل عليها).

سبّان سوسن معالج واتهام جليلة بكّار والفاضل الجّعايبي بالالتفاف على الثورة (في حين أنّو لسعد عثمان أكثر واحد تلهوث عليها إلى حدّ الآن)



سبّان وليد النهدي وبوه لمين:


حتّى الهادي ولد باب الله اللي شدّ الحبس خاطرو قلّد بن علي ما منعش منّو:



وعلى حيط شمس آف آم زادة:


فيديوات العراء والكلام الزايد اللي ما ينجّمش ينشرهم باسمو الحقّاني:


سبّان العباد اللي ينقدوه في بروفيلو الأصلاني في حالة ما إذا "اصحابو" ما اقتنعوش اللي هو تجمّعي والا شلائكي والا يدافع على نسمة. التّصاور هاذم من حيط لسعد عثمان:

هنا مثلا حكاية الديار و"أوكار الزنا" معروف بيها هوّ ديما يسبّ بيها العباد، وسبق أن قالها على مفيدة التلاتلي في فيديو:


وهنا واحد لامو كيفاش حطّ تصويرة سوسن معالج، لاحظو اللي هوّ وجّه تعليقو للسعد عثمان، اللي مالقى ما يجاوبو قدّام العباد باسمو الحقّاني ياخي جبدلو البروفيل المضروب باش يسمّعو ما يكره:


وتوّة نحبّكم تركّزو مليح، في التصويرة هاذي لسعد يجاوب في طفلة ماعجبوش كلامها على الفيديو متاعو، في الأوّل بالبروفيل المضروب باش يسمّعها الكلام الزايد، ثمّ باسمو الحقّاني باش يلعب دور الضحيّة .. لاحظوا تطابق أسلوب وطريقة الرّقن:



وهذا مثال آخر: 


والأهمّ من هذا الكلّ، هو التّرويج لفكرة أنّ لسعد عثمان هو "فنّان الثورة بلا منازع" و "من طينة الفنّانين الكبار" و "الوحيد اللي يبات في القصبة مع المعتصمين"، معناها نفس الصّورة اللي استغربنا كيفاش وصلو يصدّقوها عباد كيف ماهو مكتوب الفوق بالكلّ. وإذا عُرف السبب بطل العجب:


والشيّ اللي يبكّي ويضحّك في نفس الوقت هو درجة الانفصام اللي وصللها لسعد عثمان، واللي وصّلتو باش يكتب خور كيف هذا يبرّر بيه توقّف الفيديوات متاعو وقت اللي ما يلقى حدّ يسبّو في فايسبوك:


وقت اللي تربط الخيوط الكلّ، تفهم اللي لسعد عثمان موش راكب على الثورة كهو وإنّما يحبّ يحتكرها فنّيّا زادة، فمن ناحية يضخّم في تصويرتو على فايسبوك (بالسبّان الفارغ اللي ما عندو حتّى علاقة بالكوميديا ولا بالفنّ)، ومن ناحية أخرى يشوّه في صورة الزملاء متاعو في المسرح وخاصّة اللي شاركو في الإحتجاجات والإعتصامات.

وهذا الكلّ علاش؟ هاو علاش:



والسّلام عليكم ورحمة الله وبركاته.

  

34 تعليقات:

تعليق غير معرف ...

ya3tikom essa7a haw el investigation walla blech ...

22 مارس 2011 في 7:34 ص

تعليق ماهر ...

ملاحظة اولى : يا اولادي اش مجبدكم في العلمانية. ياخي ولات تهمة؟
بالنسبة لهذا المهرج متاع لسعد كازي. بالرغم من اني نعرف عالم المسرح في تونس منذ 10سنين عمري ما سمعت باسمو قبل شهر...اش هل الهم و الميزيريا في هالبلاد...واحد نكره ومقمال يقارن في روحو بفاضل الجعايبي!!!!!

22 مارس 2011 في 9:51 ص

تعليق غير معرف ...

raisonnement ma39oul yaser

22 مارس 2011 في 9:57 ص

تعليق غير معرف ...

3adetha 3lia ha lat3ess
hhhhh

22 مارس 2011 في 7:14 م

تعليق غير معرف ...

bravo,....

22 مارس 2011 في 7:17 م

تعليق غير معرف ...

bravoo mtanwcha
معا لفضح المرسكيين على الثورة
a diffuser

22 مارس 2011 في 7:19 م

تعليق غير معرف ...

ya3tikom essaha mais bon hetha las3ad ena wahda mn ness ma na3refouch 7atta chkounou !!!! w 7ata ki ya3mel masrahiya 3omri nfaker bech nodkholou wla nadfa3 flousi netfarij f kachkhtou

22 مارس 2011 في 7:24 م

تعليق غير معرف ...

impossible !! wallahi tesdamt ama mouch fih howa 5ater ena awel mara riotou cha5s hedha ba3d mahrab ben 3li wa9teli nes lkol walet ta7ki wa9tha bel amara 3lem oufida tletli w 9al 3liha yar7em 3ammi w kerya dar w lesbienne w...wa9tha 3raft niveau mte3ou w zed fi kol video haw yetla3 ynaguez kif l 9erd haw yseb w y9oul fi klem mta klocharat..ya3ni na3rf mli7 eli rekeb 3le thawra..ama eli sdamni w dha7akni w 5aleni n7el fomi 5ater mekontech netsawer eli fama 3bed b darja hedhi!!wa9teli 9aren rou7ou b lamin nahdi !!hedha mriiiiiiiiiiiiidh o9ssem beleh mridh msiken..ti 7ata fel 3ada mech beeesel walah ymararha l forja pourtt dima les roles mte3ou secondaires et malgré ça t7essou rzin w wken madhhorch jemla 5ir..ya rabi fama 3bed b darja hedhi?w chnowa leklem eli yet9al heka brabi?3lech nes tethakem 3le a3radh nes wel wleya mahma ken? rasoul 3lih slet w slem 7arem 3al m eslmin ena nehtkou a3radh b3adhna fi 7ajet l wade3..wba3d y9oli rani m eslem w ndefa3 3al islem w nkafer nes lkol? ken tettaba9 cheri3a walah hedhom akther nes bech yet3a9bou 5ater ma3andhom 7ata 3ale9a bel islem w ba3d y9olek ena rasoul eli nmathel leslem wena l mounadhel eli 7arart lebled men ben 3li..walahi 3iiiiiiiiiib hali 3aychinou..ena meli rit les videos mte3ou 3raftou inssen 9albou mouch 3le tounes 5ater walah ili y7eb bledou w twenssa b3omrou may7awel bech yezra3 l fetna bin wled hal bled l we7ed!!w howa heka 3lech 5dem fi les videos mte3ou..w fama video mathel fih 3lina lin chba3 wa9tha fel 9asba ba7dha de5ilya kif 3mal rou7ou deya5..wy9oul l9ayel enti chhazzek l de5ilya kif le3tissam fel 9asba?inssen jehel w mon7at w ken jé 3fif w chrif w met5alla9 bel7a9 kif ma7ab ye9na3 la3bed fel page mte3ou raw ma9belch bech we7ed bel in7itat heka w b9ellet torbya heki (ichki bih ) faradhan mouch howa hedha..bech ydefa3 3lih bel osloub heka w bel manta9 heka !! walah fi blastou maneblokih howa mouch lowel..ama yesser ùchal9 brou7ou plutot rabi sob7anou che2 bech yefdh7ou bzalletou

22 مارس 2011 في 7:27 م

تعليق Oussama ...

تي ماتقوليش موش مفتش ڨطوس هذا! تي كي شنوة تعمل مانصدقش!
حتى كان موش هو با ا ا ا از شكون متعلم من عندو
:-D

22 مارس 2011 في 8:20 م

تعليق غير معرف ...

هذا مش راكب برك ع ثورة عاطيهولها اصلا عملو العار كل واحد يضرب على درابوه

22 مارس 2011 في 10:52 م

تعليق غير معرف ...

ena konét 7adhrra 3al 3Arkka mta3 él béra7 w ayadtha é toflla élli kéchféttou radnni 7atta ena 3amilla w téb3A nésmma w hanabaaallllll
ena bsara7a konét féy9a bih mé loul w enchalla ya rabbi les amis elli 3Andou ifi9ou élli chakhéss hédha rahou mounéfé9 w éstéghlélli w i7éb yétéchhar 3la 7sséb é thawrra w 7sséb é cha3éb

22 مارس 2011 في 11:49 م

تعليق Hassen ...

هالحقير إفسخ تعليقات كلّ من يعارضه أو يسيتنكر رداءته و بلوكاني مالصفحة متاعو. كاراكوز لا عندو مستوى فنّي لا أخلاقي!

22 مارس 2011 في 11:50 م

تعليق غير معرف ...

bravoooooooooooooooooo
والله بردتولي على قلبي من هالتعيس الماسط
وقت الفاننين ياكلو في العصا قدام المسرح البلدي هو مخبي راصو واليوم ركب ومد ساقيه

يرحمو اللي قال جبالك الرواسي ولا عبدك الثقيل

23 مارس 2011 في 1:52 ص

تعليق Unknown ...

السلام عليكم
الحقيقة أنا في الأول كنت نكذب و نصدق أما كي عملت طلة على البروفيل إشكي بيه لقيت اللي هو ولا يسب في لسعد عثمان على أساس أنو فسخو من قائمة أصحابو وهذا يظهر اللي كلامكم صحيح
آما الرد متاعو كان بصراحة مخجل و مضحك

23 مارس 2011 في 7:27 ص

تعليق rihab ...

Rihab de Tunis:
echakhs hetha mridh fi mokhou en plus mayhebech el khir lil la3bed wzidkom zyeda 9alleb je le conné en personne wkhdemt m3ah wma3tanich hakki walla ensen maykhafech rabbi.

23 مارس 2011 في 2:45 م

تعليق غير معرف ...

bien ken li9oltou s7i7 rahou 3iiiiiiiiiiiib 3lih, ema zeda sama7ni zeda lem3alij we barcha kifha mhomch mlayka we mech na9siiiiine we nessma we zabenya mta3ha zeda 3liho akther melli fihom. bon ena rani anti fetna we chay li sar mech 7lou. a7na moslmine rahou we 9ellet la7ya we lefsed fi l3alan mech behi. au moin sotra mech fi tlavezna we aflamna .rabbi yehdi men 5la9
by chouchenly

23 مارس 2011 في 9:24 م

تعليق غير معرف ...

ينجم يكون كلامك صحيح اما هذا موش مبرر باش تقدم ناس كيما سوسن معالج ولا العبدلي في شكل أبطال هوما يقعدو ديما في نظر أغلبية التوانسة خطر يهدد شبابنا بالميوعة و الفساد ونفكرك اللي هوما ما خرجو للشارع كان في الايامات الاخيرة بعد نقد لاذع من جمهور الفيس بوك و اللي كاتبلو باش ياكل ضربة كلاها و العبدلي قال اللي قالو بعد ما فقد بن علي الهيبة متاعو تماما وقالها لنفس الغرض اللي يعمل من أجلو لسعد عثمان وسامحني مرة أخرى هاذوما ناس ماوراوناش في التلفزة اللي هوما يستحقو ذرة احترام بل بالعكس حبو يظهرو على حساب مبادئنا و أخلاقنا وربي يهدي الناس الكل.

23 مارس 2011 في 11:28 م

تعليق يونس الذهبي ...

الضبابية تعم كل شيء في تونس الثورة فلم نعد نعرف الخطء من الصحيح و كل يدعي حب ليلى على كل ستبدي لنا الأيام ما كنا نجهل و يأتينا بالأخبار من لم نزوّد

24 مارس 2011 في 10:30 ص

تعليق غير معرف ...

euh, ye5i chkoun lassad ben othmen?

24 مارس 2011 في 12:57 م

تعليق رمزي ...

توضيح للحشرات اللي خلاّو (وإلاّ ناويين باش يخلّيو) تعاليق السفاهة والكفر والكلام الزايد. مافمّة حتّى داعي باش تتعّبو رواحكم بما أنّ التعاليق متاعكم ماهيش باش تتنشر ونهايتها هي سلّة المهملات. هاكم عطيتوني فكرة إضافيّة على المستوى الأخلاقي والدّيني متع نادي "أحبّاء" لسعد إشكي بيه، ولو أنّي كنت متأكّد اللي جربوع كيفو ما ينجّمو يتبّعوه كان ناس في أسفل السّافلين.

24 مارس 2011 في 5:10 م

تعليق غير معرف ...

لا أظن أن هذا الشخص يعني شيئا عند غالبية التونسيين و لكن الآخرين الذين ذكروا في هذا المقال و أمثالهم يعنون الكثير فهم الذين عملوا ليلا نهارا على تعميق انبتاة التونسيين و انسلاخهم عن قيمهم و أخلاقهم.

24 مارس 2011 في 5:30 م

تعليق غير معرف ...

هذا شلاكة مالشلايك اللي تحب تركب عل الأحداث
شكون هو باش يتمقعر على سيدو النهدي
آش قدم للفن التونسي
مجرد مهرج كان يتمعش بشوية فتات تطيشهالو حنبعل في رمضان
مساكن التونسة بعد الثورة كل يوم تطلعنا شلاكة

26 مارس 2011 في 1:19 م

تعليق غير معرف ...

أنا تونسي حر، وممكن نتعرض للسجن والا لعقوبة كبيرة في قضية ملفقة والحاكم إلى حد الآن معذور على خاطر ما خلاوش العرائض اللي عملتها للسيد وكيل الجمهورية لكلها تحفظت؟؟؟؟؟؟؟ علاش؟ الله أعلم أما بش نستنى إصدار الحكم ونترقب الجلسة إلي باش يحظروا فيها المحامين اللي طلبوا بش ياخذوا القضية على حسابهم بدون مقابل على خاطر مقتنعين بكذب المدعين و بهتانهم ولكل من النظام الفاسد إلي مازالوا ذيولوا يحركوا في الطماعة والجواعة الأنذال على خاطر الجيعان الحر يجوع وما ياكلش الزبلة
تحية كبيرة لرجال المسرح إلي قالوا كلمت الحق وقت جاتهم الفرصة: العبللي واصحابوا
ونقوللهم كيما قالوا جدودي &&قالوا يا بابا هيا نوليوا شرفة، قالوا يا ولدي حتى يموتوا كبار الحومة**

27 مارس 2011 في 1:47 م

تعليق غير معرف ...

tawa ki tejbdou 3lih elli hwa rekeb 3al thawra nehemkom ama bech t5arjouli moufida tlatli batala fi zmenha sam7ouni !!!

27 مارس 2011 في 9:29 م

تعليق غير معرف ...

tawa ki t9oulou 3lih rekeb 3al thawra nefhemkom mé t5arjpouli el j3aybi w moufida tlatli abtal !!!!!

27 مارس 2011 في 9:31 م

تعليق غير معرف ...

bravo 3al ba7th eli 3maltouh

28 مارس 2011 في 3:06 ص

تعليق Unknown ...

mdrrrrrrrrrrrr
maintenant il a changé le nom et a éffacé ces coms à propos de lassaad: donc une confirmation de ce con

29 مارس 2011 في 3:20 م

تعليق غير معرف ...

5alih taw yedour yedour w yarja3 yetchal7et ama lazemna ntafiweh 7ata ki ysseb na79rouh

29 مارس 2011 في 3:22 م

تعليق غير معرف ...

ti 5alih taw todhrbou la7yout w yerja3 ki kalb

29 مارس 2011 في 3:24 م

تعليق Roxie White ...

soit je suis ignorante, soit je suis attardée :s j'ai jamais entendu parler de ce Lassaad Othmane que ce soit durant la révolution ou même en tant qu'artiste avant!

Bravo pour l'investigation! et bonne continuation!

29 مارس 2011 في 3:42 م

تعليق غير معرف ...

bravo pour cet article ca me rappelle le journal du canard enchaîné

29 مارس 2011 في 4:04 م

تعليق غير معرف ...

انا اول مرة شفتلو فيديو عامل فيه جوار مع واحدخارج من الحبس وكان يشجع فيه ويقلو لو كان الحكومة ماتعاونكش في ظرف3ايام اش تعمل في روحك..ويجاوب لاخر نحرق روحي...كيف عارضتو وقتلو ياخي انت تحرض فيه؟؟؟بعثلي وقالي اش دخلك انت هداكا خو مرتي..ومن وقتها كل مرة نراه مهبط كارثة

6 أبريل 2011 في 2:46 م

تعليق غير معرف ...

s'il s'avère que c'est un salaud tous les noms que t'a cité (m3alij, j3aybi, etc) n'en manque pas aussi ce sont eux aussi des salauds avant la révolte et après la révolte.

16 أبريل 2011 في 2:37 ص

تعليق غير معرف ...

kaleb mel kelab

17 أبريل 2011 في 10:13 م

إرسال تعليق