قبل ما نبدى التدوينة نحب نوجه رسالة واضحة لما يسمى "احزاب المعارضة في تونس" أنو المدونين و مواقفهم لا تتحمل المزايدة و أنو وصفهم و ادخالهم تحت مظلة "المراهقين سياسيا" و الذاهبون نحو المجهول و "الاقلية " و نفس اللغة الي كان يستعملها معانا التجمع الدستوري الديمقراطي راهي معاتش تنطلي على الشعب.
و هنا نقصد في الحزب الديمقراطي التقدمي الي كاينو عامل علينا مزية كي عرفهم او المعلّم متاعهم عمل اضراب جوع على خاطر بن علي صادرلو الجريدة متاعو.
احنا كمدونين او عل الاقل المجموعة الي خولتلي نحكي باسمها من مدونين مناش باش نقولو اش عملنا لانو الى عملناه ناس الكل تعرفو و مهاش مزية و انما هو واجب في سبيل المساهمة في تحرير البلاد هاذي.
المدونين ماكناش في الصف الخلفي نطالبو باقالة وزير الداخلية الحاج قاسم و قت الشعب التونسي الكل كان يطالب باالاطاحة ببن علي.
المدونين كنا اعلاميين ساعة الحدث سوءا في مدوناتنا و حتى الفايس بوك وكنا بجانب المطالب الشعبية و قت كلات بعضها هبطنا للشارع و كنا من أول الناس الي هبطت للشارع تساهم في تأطير الجماهير و اعتقال بعض المدونين و حجب المدونات و قرصنة الحسابات اكبر دليل على ذلك.
اضافة إلى انو بعد الاحداث و الاطاحة ببن علي كنا من الاوائل في الشوارع في الليل نحصرو في المليشيات و في النهار ننظفو في البلاد.
ياخي وين كانوا قيادات الديمقراطي التقدمي و قت بوزيد شاعلة؟ ياخي شبي هؤلاء المعارضين مهبطوش لشارع و مشاو لبوزيد؟ و شبيكم مطالبكم كانت محتشمة؟ شعب يعيط خبز و ما وبن علي لا و انتم تحبو تخليو بن علي و تعملو معاه حكومة وحدة و طنية بعد ما وعدكم بوزارة و ليتو تسعاو جاهدين لاجهاض الثورة؟
ياخي يا سي الشابي نسيت الي كنت مبعوث متع بن علي؟ و نسيت الي انتي نديت من القعدة في الكراسي متع سفارة امريكا ؟
كنت انتي و جماعتك تلومو على برهان بسيس و سمير العبيدي فها انتم بيدكم وليتو اشد المدافعين عن الحكومة و الناطقين باسمها؟ بالرغم انو ثمة ناطق رسمي؟ و نهار كامل مادين وجوهكم في الميديا و تهمشو في الحقائق و تعملو في مانيبيلاسيون و تقريبا باش توليو تعيطو على شباب الثورة "مرتزقة" و "متمسحين بالسفارات الاجنبية"!
قبل كنا حكينا في المدونة هاذي على الأحزاب الي تحولت لصالة أفراح ... و الحفلة الي منظمها التقدمي الديمقراطي أكبر دليل على كلامي.
يعني في الوقت الي الناس ملوحة في القصبة وربي يعلم بحالها تطالب باسقاط الحكومة و في الوقت الي التوانسة خارجين من كل بلاصة يطالبو باسقاط الحكومة فانو الشابي و مايا يتحولو من "سياسيين" الى متعهدي حفلات في نيّة مقعمزة لتغطية احتجاجات الشارع، نفس الأسلوب الي كان يعتمدو قبل التجمع الدستوري الديمقراطي و جمعية فرحة شباب تونس: يشوفو واحد شاب خاصة مغني راب متعاطف معاه الشباب و يجيبوه يغرد الدخلة بلاش باش يلهيو الناس و يدغمجوهم شوية.
على هاكة التقدمي الديمقراطي جاب الجنرال و من بعد عمل ندوة سياسية لانو الحزب هذا يدرك جيدا انو لو باش يعمل ندوة سياسية من غير ما يعزف عل الوتر الحساس و يتاجر بورقة الجنرال فانو الشباب باش يبعثو في ساشي كحلة و ميجيه حد و انو الشابي باش يقعد ينظر و يخطب في جماعة حومتو.
يا عم الشابي عيب راهو كي متحترمش ارادة الشعب و تحجب الحقيقة بزوز نوامر الله أعلم منين جبتهم و بنفس السياسة متع بن علي.
عيب راهو كي تلعب باوراق حساسة باش تستقطب الشباب و تستغل منصبك في الحكومة "المبشولة" باش تعمل دعاية لحزبك على حساب الأحزاب الأخرى.
راهو عيب و انتي راجل كبير تساهم في الالتفاف على ثورة شباب تونس و تقامر بمستقبلهم لأنو حسب ما نشوف اتي راجل كبير و معاتش ثمة مستقبل يستنى فيك.
و اخر قولي حزني و المي عميقان لانو ثمة ناس مزالت مفهمتش و لو انو بن علي فهم انو الشعب هذا معاتش تتعقب عليه.
7 تعليقات:
اقترح على الجماهير الرياضية الذهاب إلى هذا الحفل والدخول ورفع شعارات :
1. تسقط الحكومة اللاوطنية
2. يا شابي يا عميل يلي بعت القضية
3. ...
طول إمتداد الحفل وقلب الحفل إلى درس لهذا الحزب الضحل
خيبت ظنّي الاستاذة مي الجريبي
لم أتوسّم يوما خيرا في هذا الرّجل و من معه في هذا الحزب ومعه حركة التّجديد أمّأحزاب الموالاة فإنّها ولدت ميّتة من وجهة نظري و ما أثار استغرابي هو تكالبهم لمخاطبة الشّعب التّونسي من خلال وسائل الإعلام في كلّ فرصة ينقضّون عليها فالشّابي مثلا استدعى نفسه بنفسه في قناة حنّبعل ( خسارة فيها الإسم) ولايفوّت لحظة واحدة للتّرويج لحزبه و الحديث عن نفسه بنرجسيّة مقيتة متناسيا تضحيات الشعب التّونسي بكلّ فئاته ، أنا أتساءل لم نجد وزراء " المعارضة " يطلّون علينا دون غيرهم للحديث عن حكومة الانقاذ و برامجها و يبالغون في الحديث عن نضالاتهم الوهميّة من أجل هذه البلاد ؟ فاليوم والشعب التّونسي يتظاهر لم يشارك أحبّاء هذين الحزبين في هذه المظاهرات التي تزداد زخما كلّ يوم بل مستلقون على الكراسي الفخمة في قصر المؤتمرات وغيره منتظرين نصيبهم من أموال هذا الشّعب التي تنعّموا بها في زواج متعتهم مع النّظام السّابق في إطار ما يعرف بتمويل أحزاب الموالاة التي كانوا و لازالوا من وجهة نظري ينتمون اليها رغم ادّعائهم الكاذب بأنّهم حزب المعارضة الجدّية
لا حول ولا قوة الا بالله العلي العظيم
والله الشهداء ما زالت قبورهم لم تجف
وامهاتهم وزوجاتهم دمعتهم الى الحين على خدودهم
المفروض يكون عندهم شوية دم واحساس بجراح الناس
في الواقع نجيب الشابي هو متواطئ مع نظام بن علي ولذا يجب المالبة اقالته من الحكومة المؤقة,لان مثل هذا الشخص يمكن ان يتعامل مع التجمع لكسب الاصوات في الانتخابتت.
حسبنا الله و نعم الوكيل فيهم..
يرحم والدين والديك ايها المدون برتلي على قلبي حزب الشابي هو التجمع رقم 2
إرسال تعليق