مرحبا بيك في محور الشرّ

اليوم العشيّة ضربني القلق ياخي جبدت DVD متع concert مادونا اللي عملتّو عمناول في الأرجنتين، وهو بالمناسبة عبارة على محفل ماسوني يدوم قرابة السّاعتين وكان يطيحو بيه هاك الشّتلّ متع Quitter le zéro ومن لفّ لفّهم توّة يحقّقو الإكتفاء الذّاتي متاعهم من الفيديوات من هنا لنهار خروج المسيح المضروب.

عاد وأنا نتفرّج في الـ interlude اللي اسمها Get stupid، انتبهت لحاجة ما ريتهاش قبل رغم أنّي تفرّجت في الحفلة أكثر من مرّة. يمكن السّبب هو التّلاحق السّريع متع التّصاور اللي ما يخلّيكش تركّز.

التّصويرة اللي "بهّمتني" بالحقّ هيّ هاذي:

علم تونس مكتوب عليه "احصل على غبيّ" بالمقلوب (هاذي أكيد ترجع لكونهم ترجمو عبارة Get stupid بإحدى البرمجيّات البودورو فتحصّلو على "احصل على غبيّ" في عوض "كن غبيّا")، وفي الوسط تصويرة شيخ ايراني (نعرفو مليح بالوجه أمّا نسيت اسمو، الله غالب).

اللي فهمتو من الفيديو هو أنّ مادونا قاعدة توجّه في رسالة تدعو من خلالها للتحرّك ضدّ  الأديان و التّغيّرات المناخيّة والدّكتاتوريّات وكلّ ما ترى هي أنّو من شأنو باش يزيد يدخّل العالم في حيط. لكن اللي ما فهمتوش هوّ: هل أنّ العلم متع تونس تحطّ في الفيديو بنفس البهامة اللي تترجمت بيها العبارة للعربيّة؟ أم أنّ هناك نيّة مبيّتة من الماسونيّين باش يحشيونا في العجّة متاعهم ويلصّقونا لإيران؟

كان تطلع الفرضيّة الثانية صحيحة، نقول ناري عليك يا ديبلوماسيّتنا، فبعد الـ 200 سنة فراندشيب مع عمّك سام ما شفعلك شيّ عندو، قعدنا عندهم كيفنا كيف أيّ بلاد تاعبة كي ما يلقاولهاش تصنيف يلكّدوها لمحور الشرّ.

حاصيلو، الصّورة موجودة في الفيديو التّالي في الدّقيقة 1 و 17 ثانية، وكان فهمتو حاجة  أخرى فهّمونا معاكم.