Le zéro qui veut quitter moins l'infini

كيف ما نعرفو النّاس الكلّ، باش تعمل page على فايسبوك ماهي الاّ حكاية لا تتطّلب لا وقت ولا مجهود، إذ يكفي أنّو يكون عندك بروفيل وتعمل الباج في أقلّ من 15 ثانية. لكن يقول القايل كيفاش باش تعبّيها الصّفحة هاذي بالعباد؟ والسّؤال الأهمّ هو: كيفاش صفحة تافهة لا ساس لا راس لا مضمون لا أهداف لا خليقة لا صنيعة ويوصلو يتكتّلو فيها بالـ30 والـ40 ألف رقبة في وقت قياسي؟

الإجابة لقيتهالكم اليوم في صفحة الصّفر اللي يحبّ يغادر الصّفر إلى اللاّنهاية واللي يمثّل عيّنة هايلة من المرضى النّفسيين اللي ولّى الفايسبوك يغلي بيهم. نعرف اللي كلامي باش يوجع بعض ناس بحكم صداقتي ليهم وبما أنّو وقع تعيينهم (من طرف نفس المريض النّفسي) باش يشرفو على صفحة الصّفر وغيرها، لكن الله غالب ، كلمة حقّ ولازمها تتقال، رمّانة ولازمها تتفرّك بعد ما استفحل الشيّ وولاّت المهزلة في جرّة أختها.

باهي يا سيدي، باش تحبّو نبدالكم؟ برّا نبداو بحكاية السّرقة:

أكيد فمّة شكون من اللي قاعدين يقراو يعرفو المَجْمَع التّدويني التّونسي tn-blogs واللي هو عبارة على موقع تلقى فيه برشة مقالات تونسيّة باللهجة الدّارجة واللي تتناول عديد المسائل اللي عندها علاقة بتونس، سواء سياسية والا رياضية والا ثقافية والا غيرها. الموقع هذا، كيف ماهو مصدر معلومات لأغلبيّة الناس اللي يزورو فيه فهو كذلك مصدر للشلاكة اللي نحكيو عليه اليوم، موش مصدر متع معلومات وانّما مصدر متع سرقة وتحتريف. السيّد هذا آش عامل؟ كلّ مرّة يعمل كــَسّة على مدوّنات العباد ويعمل ضربة copier-coller يهزّ المقال بحشيشو وريشو يلصّقو في الصّفحة متاعو في ألبوم متع تصاور مسمّيه شويّة تنبير ع الطّاير (معناها يرى في روحو نبّار هوّ هههه). بالطّبيعة ماهوش قاعد يسرق في أيّ مقالات وانّما التّدوينات اللي خذاو شهرة كبيرة في البلوغسفار التّونسي:

وباش ما تتهمونيش أنّي نتبلّى على العباد (رغم أنّي ما نعتبروش عبد)، جبتلكم شويّة أمثلة من السّرقات هذه بالادلّة والرّوابط. لاحظوا اللي بعض الأمثلة هذه (الأصليّة) يرجع لعام 2007 (معناها وقت سي الصّفر مازال في الرّوضة). لتكبير الصّور اضغط عليها:

مثال عـــ 1 ـــدد: تدوينة (دكتور في شنوّة يا مادام؟) متع المدوّن قصّة أون لاين:

الأصلي:

المسروق:

مثال عـــ 2 ـــدد: تدوينة (مبيديّات) متع المدوّن Metallistic:

الأصلي:

المسروق:

مثال عـــ 3 ـــدد: تدوينة (زمن العجايب) متع المدوّن Big Trap Boy:

الأصلي:

المسروق:

مثال عـــ 4 ـــدد: تدوينة (يا حسرة على فخّار بكري) متع المدوّن آدم الصّالحي:

الأصلي:

المسروق:

هذه ماهي الاّ أمثلة بسيطة من السّرقات الموصوفة اللي يمارس فيها سي الصّفر خاطر اذا باش نورّيكم قدّاش حترف من تونيزي بلوغز وحدو، تحبّلي نهار كامل وما نكمّلش. معناها الشّلاكة هذا حاشاكم وحاشا قدركم كيف هاك البَقّة اللي تمصّ في دم غيرها: لا يذكر مصادر لا يعطي رابط لا والو. تحبّو تعرفو علاش؟ هذا عافانا و عافاكم الله مرض نفسي يصيب العباد اللي ما تلقاش شكون يهتمّ بيها في الدّنيا، ينبح، ينهق، ما يتلفّتلو حدّ. آش يعمل وقتها عاد؟ أفكار عباد حاضرة باش وزيد موش أي أفكار: مقالات تحصّلت على عدد كبير من الأصوات وقت اللي تنشرت، وهو ما عليه كان يقصّ ويلصّق فمّاش ما يكتبولو هاك الـ20 والا 30 تعليق loool و bravo و MDR ويحسّ بروحو عندو شويّة قيمة (ولو افتراضيّا) ويجيه النّوم في الليل.

لا والأغرب من هذا الكلّ، نفس الشّلاكة عمل un compte Blogger وقاعد يجرّب في قدراتو في التّدوين وماهوش فاهم اللي المسألة ماهيش مسألة قدّاش من عبد يتبّعوه ولاهو حابب يفهم اللي عشرات الآلاف اللي لمّهم بالفايسبوك ماهمش باش ينفعوه خاطر الصّفر ديما يقعد صفر. 

توّة نتعدّاو لبقيّة الطّرق اللي المريض هذا وأمثالو يعبّيو بيهم في الصّفحات متاعهم على فايسبوك. بعد ما شفنا السّرقة توّة باش نشوفو للتنويم المغناطيسي بحكايات الماسونيّة: شويّة The Obama Deception على The Arrivals على ضربات Project HAARP وهو ماشي، وبالطّبيعة كلّ فيديو فيها رابط الصّفحة باش يحصّل أكبر عدد ممكن من الشّباب:

ووقت تجي تعمل طلّة على يسار صفحة الصّفر، تلقى روابط يهزّو لعشرة صفحات أخرين يستغلّو في مشاعر العرب والمسلمين لغاية وحدة وهي جمع أكبر عدد ممكن من الأعضاء. موش باش يوعّيهم والا ينفعهم وانّما باش يقعد يدور بيهم في نفس الحلقة المفرغة متع الخزعبلات والعوالم الخفيّة. يجي بكل بساطة يعملَك صفحة يسمّيها الاسلام والا أنصار محمّد والا فلسطين حرّة (عناوين تستفزّ النّخوة العربيّة-الإسلاميّة)، وكلّ صفحة يعمللها اشهار في صفحة أخرى حتّى يوصلو 50 والا 100 ألف fan بين ضحك ولعب. معناها حطّلو انت كلّ صفحة يضرب فيها ساعة في النّهار، وزيدو وقت التّشمشيط على مدوّنات العباد فمّاش ما يسرق حويجة ينشرها، وشويّة سكايب وأفلام، تلقاه يرقد في ساعة والا ساعتين في النهار كان طارت.

هذا عاد من غير ما ننساو الرّكوب على الأحداث واستعمال حكاية الشّيعة وغيرها كطريقة لاستجداء التّعاليق. 

وفي الختام نحبّ نتوجّه بالرّسائل التّالية:

1. إلى بعض المشرفين على هذه الصّفحة التّافهة ومثيلاتها، واللي موجودين في قائمة أصدقائي على فايسبوك: طحتو من عيني.

2. إلى أعضاء هذه الصّفحة ومثيلاتها: ياخي ما تاقفوش حتّى لحظة بينكم بين رواحكم وتسألو رواحكم آش حصّلتو منها الباج هاذي مثلا؟ تلقى اشهار تمشي تكليكي كيف الدّغف؟ والا جدّ عليكم اللي حيوان كيف هذا باش يخرّجكم من الصّفر؟ ياخي ينجّم  يوصل للصّفر جملة هوّ باش يخرّجكم منّو؟

3. إلى الشّلاكة اللي عمل صفحة الصّفر: والله آش باش نقلّك، تفيه عليك وياسر فيك.

وما ننساوش الضّحكة هذه واللي تجسّد تماما المثل الشّعبي التّونسي: جزّار يعظّم على مراقزي. 

والسّلام عليكم ورحمة الله وبركاته

تحيين: بعد نشر المقال هذا بأقلّ من ساعة، وبما أنّ الشلاكة مولى صفحة الصّفر أجبن من أنّو يواجه أعضاء الصّفحة متاعو بالحقائق اللي نشرناهم عليه، اختار أنّو يجيبلهم الفيلم هذا باش يبرّر موقفو، وهو فيلم ما يختلفش برشة على الهيتشكوكيّات متع الماسونيّة اللي شربولو مخّو:

 المقال هذا ردّو برشة مدوّنات وصفحات، وأحنا ردّنا ملحدين. يظهرلي وقيّت باش تهزّوه لطبيب خاطرو شاكك اللي الزّلعة اللي زلعناهالو مؤامرة صهيونيّة. وزيد أنكر اللي هو سارق (رغم الأدلة الكلّ اللي الفوق). حاصيلو تنجّمو تقارنو التواريخ متع التصاور اللي هو حاططهم بتواريخ المدوّنات اللي سارقهم (بعضهم يرجع لعام 2007)، وأيّ واحد متبّع البلوغسفار يعرف مليح اذا كلامي صحيح والا غالط. نعرف اللي هو أتفه من أنّو واحد يزيد يكتب عليه سطر آخر لكن ميسالش كلّو يهون في سبيل الحقيقة المخفيّة :))))))