باعث القناة فهمكم .. إيه نعم .. فهمكم

أيّها الشّعب التّونسي

نكلّمكم اليوم .. ونكلّمكم الكلّ .. في تونس وخارج تونس .. نكلّمكم بلغة كلّ التّونسيّيين والتّونسيّات

نكلّمكم الآن لأنّ الوضع يفرض استغلال .. نعم استغلال .. استغلال فاحش وشامل. 

وأنا فهمتمكم .. إيه نعم أنا فهمتكم .. وفهمت الجّميع: النبّار .. والنّاقص حنان .. واللي ما عندو ما يصنع .. واللي طالب مزيد من النّواح والغريد.

فهمتكم .. وفهمت الكلّ .. لكن الأحداث اللي جارية اليوم في بلادنا ماهيش متاعنا .. والتّفكير في السّياسة موش من عادات التّونسي .. التّونسي اللي يتبّع في قناتي .. التّونسي اللي يبعث في الميساجات باش يربح فيات بونتو والاّ برطمان بزوز بيوت.

التّفكير موش متاعنا .. ولاهو من سلوكنا .. ولا بدّ أن يتوقّف التيّار .. يتوقّف بتكاتف جهود الجميع:  وليد الزرّاع .. هالة الذوّادي .. عبد الرزّاق الشّابي .. حسن الشّارني .. نبيل القابسي .. سحفيّين .. مشعوذين .. اليدّ في اليدّ .. من أجل قناتنا .. اليدّ في اليدّ من أجل تبهيم كلّ أولادنا. 

سيكون للبرامج اللي أعلن عليها اليوم استجابة لمطالبكم .. اللي تفاعلت معاها .. وتألّمت لما حدث شديد الألم. 

جوعي ونهمي كبيران .. لأنّي قضيت أكثر من خمسين سنة من عمري في التبلعيط .. في مختلف المواقع .. وسبع سنوات على رأس القناة .. وكلّ يوم من حياتي كان ومازال ضدّ الإعلام التونسي .. وقدّمت المغالطات .. وما نحبّش نعدّدها .. الكلّ تعرفوها .. وما نقبلش باش أيّ مخّ تونسي يخدم دقيقة واحدة.

تألّمنا لصعود ناس تفهم في السّياسة .. وأنا نرفض أن يصعد المزيد بسبب تواصل اليقظة.

 أولادنا اليوم في الانترنات .. وموش يتفرّجو في حنّبعل .. وهذا حرام .. وعيب .. لأنّنا أصبحنا خايفين عليهم من مجموعات الفايسبوك .. هذا إجرام .. وموش إعلام .. وهذا حرام .. والمواطنين، كلّ المواطنين .. لا بدّ أن يقفوا أمامهم .. واحنا عطينا التّعليمات ونعوّل على تعاون الجميع حتّى نفرّق بين هذه المجموعات من الفايسبوكيّين الذين يستغلّون الظرف .. وبين برامجنا التّبهيميّة التي لا نرى مانعا فيها.

وأسفي كبير .. أسفي كبير وكبير جدّا .. وعميق جدّا .. عميق جدّا .. فكفى نقاشا .. كفى نقاشا .. وعطيت التعليمات كذلك وكرّرت .. واليوم نأكّد: يزّي من اللجوء للحاسوب .. الحاسوب موش مقبول .. ما عندوش مبرّر .. إلاّ - لا قدّر الله - إذا حدّ حاول يفكّلك جهاز التحكّم عن بعد متاعك.

وزيادة على ذلك .. أذنت بالتخفيض في أسعار الإرساليّات القصيرة .. والمكالمات الهاتفيّة نحو القناة متاعي .. أمّا المطالب الإعلاميّة فإني نقوللكم: أنا فهمتكم .. إيه نعم .. أنا فهمتكم .. التفاهة الشاملة لكلّ برامج القناة .. وغلق جميع مواقع الانترنات .. ورفض أيّ شكل من أشكال البروكسي .. مع الحرص على اهمال أخلاقيّاتنا ومبادئ المهنة الإعلاميّة.

مع الحرص كذلك على استعمال الانترنات المؤطّر والمنظّم .. شابّ أو شايب يريد انشاء صفحة أو مجموعة .. يتفضّل .. لكن .. يعلم بيها .. ويحدّد وقتها ومكانها .. ويعلم جماعتي بيها للمحافظة على طابعها التجهيلي.

نحبّ نأكّد أنّ العديد من الأمور لم تجر كما حبّيتها .. بكلّ صراحة .. وخصوصا حكاية الطّفلة سارّة والطّفل منتصر .. غلّطوني أحيانا .. أنا موش شمس باش نزرق ع كا جراب كامل تو تو تراب الجمهوريّة .. وسيحاسبون .. نعم سيحاسبون.

ولذا أجدّد لكم .. وبكلّ وضوح .. راني باش نعمل على دعم البهامة .. على دعم البهامة .. وتفعيل الجّهل .. نعم .. على دعم البهامة وتفعيل الجّهل .. وسأعمل على صون حسابي البنكي .. ومزيد تعبئته.

عاشت القناة .. عاش باعث القناة .. والسّلام عليكم ورحمة الله وبركاته.