المدة لخرة كثرت المواقع التونسية بجميع انواعها، منها الاخبارية و الرياضية و الي حتى لاهية بتركيبة الاطعمة متع الحوت و كثرة المواقع هاذي تُعتبر فخر لينا كتوانسة و كمستعملي للانترنات لانها تثبت تمكّن التوانسة من التقنية هاذي و فرضهم لانفسهم فيها....قلت فخر كان جا الهدف من المواقع هاذي هو نشر مضمونها الي تعملت لاجلو و اتباع حد ادنى من المصداقية و الشفافية في التعامل مع الاخرين و عدم اتباع اسلوب التحيل و الترهدين.
كلنا نعرفو انو المواقع تنجم تولي مصدر متع فلوس و تعود بالنفع المادي على صاحبها من خلال الاشهار الي يكون مقياس التعامل المادي على حسب عدد الزائرين للموقع و هذا حاجة باهية لانها تشجع المواقع على الاستمرارية و تدفعها للاحتراف، نحكي على المواقع الهاوية.
لكن حين يتحول الهدف الى ربح مادي على حساب المضمون و اتباع اساليب الاستبلاه و التدرويش فهذا ما لا اقبله شخصيا.
و اليوم جبتلكم عينة من المواقع متع الدروشة الي همها بالاساس المحافظة على العدد متع الزائرين و تحقيق الربح المادي بدل العمل على التمسك بالمضمون و التحسين
موقع tounsia 4ever
اكيد برشا منكم يعرفوه الموقع هذا و خاصة البنات لانو بالاساس موجه ليهم كيما يقول هو اي الموقع لاهي بكل ما يهم المرا و يساعدها في "تركيح جوها" و النجاة من العنوسة ربي يعفو.
المهم الموقع هذا كيما غيرو من المواقع يحظى بالاشهار و الدعم كيما تنجمو تشوفو في الصورة تدعمه فيه الشركة الحنينة "سلكتا"، و بالتالي فانو الموقع هذا يلاقي في تشجيع "حاجة باهية"رغم انو موش يقدم في المطلوب منو وهذا بشهادة المشتركين فيه.
حيث انو الانسة هاذي تتشكى من عدم "الفنكسيونمون "متع الخلطة العجيبة الي يقدمها الموقع و هنا منيش باش نحكي على مضمون الموقع بالرغم انو يعتمد برشا حكاية قص و لصق و الفوسكا من المواقع الاخرى هذاكة موضوع اخر ميهمناش فيه.
المهم انو الموقع هذا الي خلى الانسة معلقة و بعثها في ساشي كحلة و ماجاوبهاش و ماحاولش انو يقدم بديل و الا يتعاون مع المسألة و يرضي زوارو. و بلوغة اخرى كي شمها الناس بدات تفصع عليه و ماتهد عليه كان البزناسة و الذكورة و عشاق الصيد في القلت و تنجمو تمشيو لصفحة و تشوفو بعينكم تو تلقاو افواجا من الجموع الي ترقد نساها و تشد النات، عاد قلنا انو الموقع هذا كي بدى يشم فيها تقراس و الخبزة و باش طير قرر يعتمد طريقة جديدة تخليلو السيت متاعو كا"لكار" الصفرا دزني و ندزك.
المشرفين متع الموقع طيشو الخلطات السحرية الكل و مواد التجميل و جابو فكرة عبقرية:
عملو صفحة عالفايس بوك اسمها نجوم الليل 2 نسبة للمسلسل نجوم الليل الي لقى نجاح كبيرو تعرض في رمضان و بداو يهبطو في هاو شوقي و هاو مروى و ها ماني يا روما ويلموا في اك الولايا الي ناقصة حنان و طايحة مونك والي كلها تستنى في واحد كيما شوقي يغنيلها "سامحتك خلاص"
كيما تشوفو في الصفحة نوعية الاسئلة: من نوع ياخي مسلسل مكتوب متاعنا ؟ياخي علاش شوقي عمل هكة ؟تو انتي في بلاصة شوقي تعمل كيفو ووو من الاسئلة البيدونة الي حتى سمير الوافي معاتش يسألهم لكن للاسف النوعية التافهمة متع التسطيح و الشعوذة و الدروشة الي هي تستقطب الناس و تخليهم يهدو افواجا المهم موش هذا موضوعنا.
عاد كيما قلنا تلاحظو في الصورة الي ثمة رابط يقلك ايجا نتناقشو هنا و الرابط هذا يهزك طول للفروم متع الموقع و بالطريقة هاذي يتمكن الموقع هذا من تحقيق نسبة زوار كبيرة بوبلّوش من غير تكسير راس و الا كوبي كولي والا خلطات، فقط زوز اسئلة بهومية و سطرين وسيب الشعب يسرح. و كونو النقاش ميكونش عالفايس بوك على خاطر هذا الاخير ما ينجم يعطيهم كان الشبّ في مادتو الخام دليل على كلامي:
هاو "cliquez içi" وين تهزك مباشرة للفروم متاعهم
تو يقول القايل وين المشكل السيد يحب يربح هو حر؟ صحيح هو حر لكن طريقة الاستبلاه و الاستغلال و الركوب على نجاح انتاج الغير هو الي موش مقبول، اضافة انو الموقع لازم يكون همّوالاول المصداقية و التمسك بالمضمون و يكون هذا الاخير هو الهدف متاعو موش الربح المادي.
ما يزيش نعانيو في اعلام رسمي بودورو نوليو نعانيو في اعلام الكتروني اخر انتن منو و اكثر انتهازية.
0 تعليقات:
إرسال تعليق