2011-11-17

شي يكوخر

شيء ينطق من الاجناب: كل نهار نفيق إنو عنا في تونس أبطال العالم في الحقارة والتسطيكه البقري و قلة الحيا ولّي عنا زادة كاينات نوع صباط وكعبات صنف بوط  .. بلاد خارجة من عشريتي إنحطاط أخلاقي ومالي  واقتصادي وسياسي  و تحطيم إجتماعي، رئيس زطال ووزراء غاطسين في الفساد المالي و 99 بالمائة  ملّي تربّحوا مالنظام وإلا كانو l'écran متاع تبييض الأموال وسرقة الأموال العامة مزالو مستحفظين بالمناصب وبالأموال ...

الجموع مزالت تبني وتعلي في عين زغوان ولاك 2 على رزق البليك إلى تعطالهم بالدينار الرمزي والكاينات إلي كنت نحكي عليهم مفددينا : شي  بميثاق مواطنة وشي دخلت لبلاد في حيط (هذيه  كان تتذكروا أيامات حملة ديقاج إلي ستهدفت رموز  الفساد ووقت الناس كانو يطالبو بمحاكمة قتالة الأرواح والفاسدين) آه منجمش ننسى مرحلة الدروس في الأخلاق إلى تعطات للتوانسه في طوليرونس مع من كان تجمعيا بل وضرورة المصالحة وحقهم إلي عطاتهولهم المواطنة في ممارسة السياسة ..

الخمج الفكري كلو كوم وضمانات لمرا التونسيه في الحفاظ على مكاسبها كوم .. نفس اللغة الخشبية ، على خاطر لو كان نحكي مع وحدة من آلاف العاملات المنزليات وبنات المعامل على المنجزات توه نشبع مشطة ومقصات على خاطر ماعمرها لمرا ما كان عندها  فرصة لاحترام الذات  .. مومسات دور البغاء العلني ينجموا ياخذو أوبسيون زايدة باش يفرغو قلوبهم في الكذابة متاع حرية لمرا . 4/5 النساء في تونس مستعبدهم الفقر وفمه مدكات يحكيو على الخوف على حرية المستعبدات .. إلي قالتلهم أسكتو حكاية الضمانات التشريعيه للأمهات العزباوات إلي عملت بولميك في مجتمع منفتح كيف مجتمعنا النموذجي ، ما يكفيش إنو قرى الأطفال تملات بالوليدات المحرومين من العيلة نزيدو نشجعو لبنيات علفساد أصلا في بلادنا معناش جرايم شرف والإجهاض بلوشي ولولد إذا جا تاخذو الدولة وترميه في قرية وكان ستحفظت بيه أمو عندو الحق في لقب عايلي والنفقة مالة شنيه الهدره؟  بوليميك ! إسلاموفوبيا على الطريقة التونسيه بالكشي  تولع ..

ربحت النهضة يا بوقلب وفجأة تحرر الإعلام التونسي باش يهاجم إرادة الشعب ويخوّف من الظلاميين.. عمركمش سمعتو إنو تونسية ماخذة غاوري رفضو باش يرسمولها غبينتها؟ آنا عشت وسمعت بوذني في الإذاعة الوطنية شكون يرعش علّي معرسين بغورة ينحييولهم حقهم في الورث وغيرو .. مصايب زرقة السبسي وفوفو خمجوها على الرّابع شيرة وفسّاد لبلاد ما فايقين كان بكلام جبالي .. عشرة شهر ما صدرش حتى حكم في قتال روح واحد والجرحى تمرمدوا وracaille الإعلام يتباكاو خايفين لا النهضة تعمللهم كيف السعوديه هيئة الأمر بالمعروف والنهي عن المنكر.. مفجوعين من كلمة الخلافة السادسة .. أوف تي كان تقوم قيامتنا ما تقومش فينا لخلافة تي هلبلاد بقرة حاحا إلي يحكي عليها الشيخ الإمام  لا وشريك سياسي علق عضويتو في لجان تفاوض قلك رسالة تحذيرية ومبدئيه.. دوحي  يا مباركة  باحمد .. علاش الجبالي قال باش ننصهرو في ماخور عالمي؟! خايفيين على مستقبل لبلاد هاكوم ما رعشتوش كيف السبسي سب البوليسية وشعره لا شعّل  لبلاد ! ومافركستوش على أسامي إلي دفعو الملاين باش تتحرق المراكز والبلديات ! هاو ما قلقكمش آداء وزير العدل ووزير الداخليه وقت إلي  17 ماتو تحت الساقين بالـintox والدعايات وما تشدوش إلي كانو سبب؟ .. قبل المعلومة الأمنية لدعم نظام زعبع الزطال حاضرة باش ومبعد  17 ديسمبر الداخلية ولات تخدم بسيستام دونكيشوت .. وما ركزتوش برشه على الإحتكار إلي تحت إشراف لحكومة ضرب الشعب وجوّع لكبار و الصغار والحراير ولات تبكي على حارة العظم إلي ولات برودوي ممنوع على أصحاب القلوب الضعيفة .. ما فديتوش على تعامل لحكومة مع ضحايا الفياضانات ..

فقيرة لبلاد بركتها الثورة والإعتصامات .. 500  مليون يدفعوهم للبوهالي باش يعمل فيلم برونوغرافيك للجهال إلّي كيفو وجرحى الثورة يموتو بدعوى نقص الإمكانيات ! شي يكوخر .. حلينا في البلاد كل إرث الفساد ، استرجعت الدولة الأملاك العمومية إلي سرقوها العصابات وتمدت بالدينار الرمزي لغولّة المقاولات .. إلي تمعشو من النظام وخدموه ، قعدو متحكمين في الداخلية و الخارجية وفي بيعان الشراب في لبلاد والصفقات العمومية والتسويات القضائية وجدولة الديون وطرح الفوايد بالمليارات و إتحاد الشغل يهدد بالتصعيد في مواجهة قرار قضائي وسحليات الإذاعة اللوطانية مستشكلين العلاقة الوهمية بين التكتل والنهضة ويبكيو من الإستقالات الممكنة لحكومة الخوانجيه إلى باش تبيلك لبلاد ..

يامروان ولدي ثور ..ميسالش يامي نحلبوه .. شي يكوخر وفا الفساد ! تنجم تقول إنو إدارة الجباية إستخلصت كل أموال الجباية إلي مكفنينها لكبارات واستغنات لبلاد والقادة الأمنيين عملو وقفة  مع الضمير وحلفو يخدمو لبلاد وروّح الصيد والعكرمي كل واحد لمربضو فرحا مسرورا وروحو رقود الجبانة لديارهم وباتت العيلة ملمومة وتنحات ملقلب الغصرات .. وفات حسابات الماضي وكل الفسّاد كفنتهم لحبوسات أفرح يا قلبي وحط في الكرهبة آفون غناية صباح ساعات .. ساعات  ..

كل  شي يكخور ويمرض بالقلب و السكر ويخرج من العقل وما  ينفعش فيه  لا دوا لا وصفات .. إلي صار فساد كارو يبكّش الشعب الكل من الحشمة لعشره سنين على فقدان  أي قيمة للوطن في كل مؤسسات الدولة .. والصعاليك خارجين ينهقوا في لبلاد ، إلي مزال محكمش نهرسلوه بالطلبات ! ولي حياة عمرو نزق نمدولو الدولة وناقفو نصفقولو ونخلييوه يعمل نشيد البلاد ليريك  غربي ناقص يعملو بومزيود ويشطح عليه مع النسا الديموقراطيات هاولدي ميمو هات الثور نحلبوه .. شبيك يامي غبروه .. لكبارات !

Guygoz 

1 تعليقات:

تعليق voidstriker ...

نقطة وأرجع للسطر .
علاه حيط كتيبة هكا XD

5 مايو، 2013 12:38 ص

إرسال تعليق